“ქართული ოცნება” არის აგონიაში, სასოწარკვეთილი, იციან რომ მათი დღეები დათვლილია და ძალიან მალე წავლენ ხელისუფლებიდან – დაჩი ნატროშვილი

სტუდენტური მოძრაობა ,,ნაბიჯის’’ წევრი, დაჩი ნატროშვილი სააგენტო ,,პარალელთან’’ ინტერვიუში კომენტარს აკეთებს ქვეყანაში შექმნილ რეალობაზე, საპროტესტო აქტივობებსა და დემონსტრანტების მიმართ ძალადობის ფაქტებთან დაკავშირებით:

• დღეს პარლამენტმა მესამე მოსმენით მიიღო ,,უცხოური გავლენის გამჭვირვალობის შესახებ’’ კანონპროექტი, რა იქნება თქვენი შემდგომი ნაბიჯები?

– ჩვენი შემდეგი ნაბიჯები იქნება ის, რასაც უკვე ვაკეთებთ ძალიან დიდი ხანია, თვეზე მეტია უწყვეტი პროტესტები და ამის გაჩერებას არ ვაპირებთ იმიტომ, რომ დღეს, საქართველოს პარლამენტში, 84-მა მოღალატემ ოფიციალურად მოაწერა ხელი საქართველოს გაყიდვას და რა თქმა უნდა, ჩვენი ერთადერთი დანიშნულება არის ის, რომ რამენაირად მივიდეთ არჩევნებამდე ისე, რომ არ დავკარგოთ ევროკავშირში გაწევრიანების შესაძლებლობა და არ მოგვიხსნან ვიზალიბერალიზაცია, რომელზეც ძალიან დიდი ხანი იბრძოლა საქართველომ.

• ბოლო დღეების განმავლობაში ვნახეთ სპეცრაზმისა და პოლიციის მიერ ძალადობის ფაქტები, დაკავებები – რა კომენტარს გააკეთებდი ამასთან დაკავშირებით?

– ის ქმედებები, რასაც ვხედავთ უკვე ძალიან დიდი ხანია სამართალდამცავების მხრიდან, ასახავს მხოლოდ იმას, რომ ,,ქართული ოცნება’’ არის აგონიაში, სასოწარკვეთილი, იციან, რომ მათი დღეები არის დათვლილი და ძალიან მალე წავლენ ხელისუფლებიდან, ძალიან მალე დატოვებენ პარლამენტის უმრავლესობას.

იმდენი რამე აქვთ დაშავებული, საქართველო იმდენჯერ გაყიდეს, ეს ყველაფერი მათ აშინებთ და იციან, რომ მათი ბოლო იქნება: ან სახლებიდან ვერ გამოვლენ, ან წავლენ ციხეში ან კიდევ მოუწევთ გაქცევა რუსეთში, იმიტომ, რომ მათ სხვაგან წასასვლელი არსად არ ექნებათ.

შესაბამისად ეს ყველაფერი, ძალადობა, რასაც ვხედავთ ყოველდღიურად, ასახავს მხოლოდ იმას, რომ ამ სამართალდამცავების უკან დგანან მშიშარა ადამიანები, რომლებიც არაფერს არ იშურებენ იმისთვის, რომ რამენაირად ეს საღად მოაზროვნე მომიტინგეები დაარბიონ, დააშინონ, აგინონ, სახლთან დახვდნენ, სცემონ და ა.შ., რომ რამენაირად ჩაახშონ ის მუხტი, რაც მიმდინარეობს უკვე ძალიან დიდი ხანია თბილისში და რა თქმა უნდა, ეს ყველაფერი მათ არ გამოუვათ, იმიტომ, რომ ჩვენ ვიბრძვით იდეისთვის და ისინი მხოლოდ სკამებისთვის.

შესაბამისად, უფრო ძლიერები ვართ და არამგონია ,,ქართულმა ოცნებამ’’ მოუგოს ამ საღად მოაზროვნე და გულანთებულ მომიტინგეებს და ახალგაზრდებს.

ავტორი
მარიამ ხაჩირაშვილი