საქართველოში მოქმედმა ცხოველთა უფლებების დამცველებმა შორენა ლობჟანიძემ, ნანა ხომასურიძემ და ცხოველთა დაცვის ორგანიზაციებმა ააიპ ,,ადამიანები ცხოველებისთვის“ თავმჯდომარემ – მარინა ბერსენაძე-კაციტაძემ და ააიპ ,,საქართველოს ცხოველთა დაცვის ფედერაციის“ თავმჯდომარემ – თემურ ლაჭყეპიანმა ერთობლივად მიმართეს საქართველოს გარემოს დაცვისა და სოფლის მეურნეობის სამინისტროს და ალტერნატიულ წინადადება წარუდგინეს:
,,ცვლილება ეხება „ცხოველების ცოფთან ბრძოლის პროფილაქტიკურ-საკარანტინო წესის“, დანართი №5-ის ახალი რედაქციით ჩამოყალიბებას, რომლის მიხედვით მოთხოვნილია უპატრონო/უმეთვალყურეო/მიუსაფარი ცხოველების ევთანაზიის გაუქმება.
არსებული რედაქციით ცოფთან შემხებლობაში მყოფი ყველა ცხოველი, რომელსაც 10 დღიანი დაკვირვების ვადის ამოწურვის შემდეგ არ გამოუჩნდება მინიმუმ მიმკედლებელი, ექვემდებარებოდა ევთანაზიას, რაც ცალსახად ამაზრზენი და დაუშვებელია.
აღნიშნული ქმედება არანაირად არ ემსახურება პოპულაციის მართვას და კომპანიონი შინაური ბინადარი ცხოველების სასიკვდილოდ გამეტებაა, მხოლოდ იმიტომ, რომ ისინი შემთხვევით აღმოჩნდნენ ცოფით დადასტურებული ინფიცირებული ადგილიდან 3 კმ. რადიუსში და მათ არ ყავთ ოფიციალური მიმკედლებელი, სახელმწიფო არ უნდა იმეტებდეს სასიკვდილოდ.
ჩვენ მიერ წარდგენილი ალტერნატიული წინადადებით 15 დღიან საკარანტინო პერიოდის გასვლის შემდეგ აცრილი ცხოველები გადადიან 45 დღიან, ხოლო აუცრელები 6 თვიან დაკვირვებაზე მუნიციპალური თვითმმართველობის ან მომსახურე თავშესაფარში სახელმწიფოს ხარჯზე და იმედს ვიტოვებთ, რომ ჩვენი ძალისხმევა შედეგის მომტანი იქნება“, – განაცხადეს ალტერნატიული წინადადებების ავტორებმა.
