“TV პირველის” დამფუძნებლის მამა, ავთანდილ წერეთელი საავადმყოფოში გადაიყვანეს. ვატო წერეთლის თქმით, მან მამა სააბაზანოში უგონო მდგომარეობაში იპოვა. ჯერჯერობით დიაგნოზი უცნობია, თუმცა ვატო წერეთელი ამბობს, რომ ავთანდილ წერეთელს გულთან დაკავშირებულ პრობლემებს სისტემატიურად უჩიოდა.
მამის ჯანმრთელობასთან დაკავშირებულ პრობლემებზე, “TV პირველის” დამფუძნებელი, პასუხისმგებლობას ხელისუფლებას აკისრებს და მომხდარს ავთანდილ წერეთლის ყოველდღიურად სასამართლო პროცესებზე დაბარებას უკავშირებს:
“ადამიანს ბრალი კი არ წაუყენეს, სიკვდილით დასჯა მიუსაჯეს. ადამიანს, რომელსაც 5 ოპერაცია აქვს გაკეთებული, რომელსაც სტენდირებები უდევს გულში და დღეში 4 ნემსს იკეთებს ინსულინისას, ყოველდღე ატარებენ სასამართლოში საათობით.
პრეცენდენტი არ არსებობს მსოფლიოში ისეთი, რომელიც ყოველდღე, საათობით 70 წლის კაცს პროცესებზე ატარებდნენ. უბრალოდ ვერ გაუძლო ჯანმრთელობით და დაემართა ის, რაც დაემართა.
დღეს რომ მოვიდა, ვსაუბრობდით, მერე მეუბნებოდა, რომ უეჭველი მიჭერენო, შემდეგ ამბობდა, ცივი ოფლი მასხამსო, შაქარი გაიზომა, აბაზანაში გავიდა და რამოდენიმე წუთში როცა შევედი უგონოდ იყო.
ამ ადამიანის ჯამრთელობასთან დაკავშირებულ პრობლემებს პირადად ვაკისრებ ხელისუფლებას“, — განაცხადა ვატო წერეთელმა “TV პირველის” გადაცემა “რეაქციაში” ჩართვისას.
ავტორი
ბეჟან ბერულავა
