ყოფილ თანაგუნდელებს შორის დაპირისპირების ახალი ტალღა აგორდა, დეპუტატი ეკა ბესელია კატეგორიულად მოითხოვს ადამიანის უფლებათა დაცვის კომიტეტის თავმჯდომარისგან პასუხს და ბოდიშის მოხდას, წინააღმდეგ შემთხვევაში სოფო კილაძეს სასამართლოში ჩივილით ემუქრება:
“მე მოვითხოვ მისგან პასუხს, დადოს კონკრეტული ფაქტები ან საჯაროდ მოიხადოს ბოდიში, თორემ მას ვერ უშველის ჩინჩალაძის სასამართლო რომაა, რომ დაიზღვიოს ამითი თავი.
ამ ცილისწამებისთვის მას აუცილებლად მოუწევს პასუხის გაცემა.
კილაძემ გადაასწრო “ნაციონალურ მოძრაობას”, რომელიც თავის დროზე, წლების განმავლობაში, არ იღლებოდა ცილისწამებებით პერსონალურად ჩემ წინააღმდეგ,”- განაცხადა ეკა ბესელიამ.
თავის მხრივ სოფიო კილაძეს მიაჩნია, რომ არსებობს ეჭვები ეკა ბესელიას მიმართ და ამ საკითხით სამართალდამცავი ორგანოები უნდა დაინტერესდნენ.
“კითხვის ნიშნები არის კონკრეტულ გვარებთან მიმართებით. კიდევ ერთხელ ვამბობ საჯაროდ: პროკურატურა უნდა დაინტერესდეს ამ საქმით. მე არა ვარ არც გამომძიებელი და არც პროკურორი, მე ეს საკითხი დავსვი როგორც უმრავლესობის სხდომაზე, კონკრეტული გვარებით.
ყველანაირად შეეცდება ეს ქალბატონი, რომ გააფთრებით დაიცვას თავისი თავი, მაგრამ თემა ის არის, რომ ვფიქრობ, მან უნდა გასცეს კითხვის ნიშნებს პასუხი, თუ თვლის, რომ ნამდვილად დაირღვა მისი უფლებები და დაამტკიცოს თავისი სიმართლე,” – აღნიშნავს სოფიო კილაძე.
