,,გამარჯვების კოალიციის” ერთ-ერთი ლიდერი, ,,სტრატეგია აღმაშენებლის” თავმჯდომარე, გიორგი ვაშაძე დღეს გამართულ ბრიფინგზე საუბრობს დღეისათვის ქვეყანაში არსებულ პრობლემებთან დაკავშირებით და კონკრეტული შეკითხვებით მიმართავს მმართველ პარტიას:
,,დღეს, საქართველოში N1 პრობლემა, უმუშევობასთან ერთად, არის დაბალი ხელფასები. დაბალი ანაზღაურება უდრის პირდაპირ უმუშევრობას და დღეს მინდა კონკრენტული მონაცემები წარმოგიდინოთ.
საქართველოში ოფიციალური მონაცემებით 261 700 – უმუშევარი ადამიანია, მაგრამ ამ რიცხვს უნდა დავამატოთ 300 ლარამდე ხელფასი საქართველოში აქვს 63 653 ადამიანს, ამდენი ადამიანი მუშაობს 300 ლარამდე ხელფასზე. დღეის მონაცემებით, 300-600 ლარამდე ხელფასზე საქართველოში მუშაობს 97 246 ადამიანი, ხოლო 600-900 ლარამდე საქართველოში დასაქმებული არის და მუშაობს 117 012 ადამიანი. ყველა ეს მონაცემი ფაქტობრივად უდრის უმუშევრობას და ფაქტიური უმუშევრობა საქართველოში არის 539 611 ადამიანი. ანუ წარმოიდგინეთ ნახევარ მილიონზე მეტი ადამიანი საქართველოში ფაქტობრივად არის უმუშევარი.
სწორედ ამიტომ არის, რომ 800 000-ზე მეტი ჩვენი თანამემამულე ქვეყნიდან წავიდა ემიგრაციაში. გაზრდილი ფასების პირობებში ეს ხელფასი, რომ არაფერია და არაფერს არ ჰყოფნის ეს არის ფაქტი.
შესაბამისად, ივანიშვილის პარტიის წარმომადგენლებს მინდა დავუსვა კითხვა: თქვენ რომ ამ ადამიანებს დასაქმებულებს ათვლით, წარმოიდგინეთ, რომ თქვენ გაქვთ ასეთი დაბალი შემოსავალი, თქვენ ოჯახებს არჩევნდით ამ ხელფასებით?! საკმარისი იქნებოდა ეს ხელფასები თქვენი ოჯახების რჩენისთვის, გამოკვებისთვის?!
საერთაშორისო მონაცემების შესაბამისად, თბილისში 4-სულიან ოჯახში 2 ადამიანს 2000-2000 ლარი მაინც უნდა ჰქონდეს ხელფასი, რომ მეტ-ნაკლებად ნორმალურად ჩაითვალოს, რომ ცხოვრობენ იმ გაზრდილი ფასების პირობებში, მათ აქვთ შესაძლებლობა თავისი ოჯახი არჩინონ.
შესაბამისად, მთავარი საკითხი დღეს ქვეყანაში არის – რატომ ხდება ეს უსამართლობა?! რატომ არის, რომ ნახვარ მილიონზე მეტი ადამიანი ან უმუშევარია ან იმდენად მცირე ხელფასს იღებს, რომ ფაქტობრივად ვერ ახდენს საკუთარი ოჯახის რჩენას და შემდგომ უწევს ემიგრაციაში წასვლა?! იმ ემიგრაციაში, რომელსაც ბატონი ღარიბაშვილი ძალიან ცინიკურად ელაპარაკება ემიგრანტებს.
გუშინ ამ ადამიანმა ემიგრანტებს უთხრა თუ უნდათ არჩევნებში მონაწილეობა ჩამოვიდნენ საქართველოში, გეგონებათ ეს ხალხი დალხენილი ცხოვრების გამო წავიდა ან დასასვენებლად არიან წასულები უცხოეთში, ისე ესაუბრებიან და ისე ელაპარაკებიან ამ ადამიანებს, ჩვენს ემიგრანტებს.
კიდევ ერთხელ: ნახევარ მილიონზე მეტი ადამიანი ფაქტობრივად უმუშევარია ქვეყანაში იმიტომ, რომ ასეთი მცირეა ხელფასი, 300 ლარიან ხელფას ადრიან დასაქმებას, რამხელა უსამართლობასთან გვაქვს ჩვენ საქმე და გვეუბნებიან, რომ ეს არის ის კარგი საქმე, რაც გააკეთა ამ პარტიამ ამ ქვეყანაში. ხალხო, 12 წელია ხელისუფლებაში ხართ, რა გააკეთეთ ამ ქვეყნისთვის?! რა გააკეთეთ იმისთვის, რომ ემიგრაციაში არ წასულიყო ხალხი?! რა გააკეთეთ იმისთვის, რომ ევროპული და ამერიკული ინვესტიციები მოგეზიდათ, რომ მაღალანაზღაურებადი სამუშაო ადგილები შექმნილიყო?! რატომ არის ნახევარ მილიონზე მეტი ადამიანი ფაქტობრივად უმუშევარი?! ეს არის რეალური ციფრები და რიცხვები, რაზეც თქვენ აუცილებლად უნდა გასცეთ პასუხი! ნუ გადაგაქვთ თემა სხვა საკითხებზე, რომელიც საზოგადოებას არ აღელვებს.
დღეს საქართველოში N1 პრობლემა არის ფასების ზრდა, უმუშევრობა, დაბალი ხელფასები, მიგრაცია, კატასტროფული შობადობის მდგომარეობა და ამ ყველაფერზე უნდა გასცეს პასუხი მმართველმა პარტიამ.
ამიტომ დღეს აქედან, კიდევ ერთხელ, თქვენთან ერთად მინდა მივმართო ივანიშვილის პარტიის წარმომადგენლებს, გაგვეცით პასუხი ამ კითხვებზე: რატომ ხდება, რომ თქვენ მდიდრდებით – ხალხი ღარიბდება, ეკონომიკის ზრდაზე გველაპარაკებით – ეს ეკონომიკის ზრდა არის მხოლოდ და მხოლოდ თქვენთვის და თქვენი გარემოცვისთვის, თორემ აგერ მონაცემები – ხომ 300–400-500 ლარზე უწევთ ადამიანებს მუშაობა. 400–500 ლარი გზაში არ ყოფნის ადამიანს, სამსახურში მივიდეს და სამსახურიდან წამოვიდეს.
ამიტომ არის, რომ ძალიან ბევრი ანებებს სამსახურს თავს და მიდის ემიგრაციაში. ეს არის ის კატასტროფული პრობლემა, რომელიც ჩვენ გვაქვს და მონოპოლიები, რომლებიც ჩამოაყალიბეს ამ ქვეყანაში იმდენად ზრდიან ყველაფრის ფასს, რომ მაღაზიაში რომ შედის ადამიანი, ფაქტობრივად მისი ხელფასით ყოველ დღე უფრო და უფრო ნაკლები პროდუქტი მოსდის, ფაქტობრივად ვერ ყიდულობს პროდუქტს და უწევს არჩევნის გაკეთება – რა აჭამოს ბავშვს სახლში?! როგორ გაუშვას სკოლაში მშიერი?! და ეს არის მთავარი საფიქრალი, სტრესი, რომელიც საქართველოს მოქალაქეებს აქვთ.
კიდევ ერთხელ, აგერ კონკრეტული რიცხვები და ველოდებით პასუხს ხელისუფლების მხრიდან, რას აკეთებთ იმისთვის, რომ ეს უსამართლობა, რომელიც დღეს ქვეყანაში არის, იყოს დამარცხებული’’, – განაცხადა გიორგი ვაშაძემ.
ავტორი
მარიამ ხაჩირაშვილი
