“ახალი საქართველოს” თავმჯდომარე გიორგი ვაშაძე საარჩევნო სისტემასთან დაკავშირებით იმ მთავარ წინაპირობაზე საუბრობს, რომლის მიხედვითაც კონგრესმენების მხრიდან პირდაპირი რეკომენდაცისა და ევროსაბჭოს რეზოლუციის გათვალისწინება უნდა მოხდეს.
ოპოზიციონერ ლიდერს მიაჩნია, რომ თუკი მმართველი პარტია უცხოელი კოლეგების რჩევებს არ გაითვალისიწინებს, მათ მიმართ შესაძლოა მკაცრი შედეგები დადგეს:
„ჩვენ უკან დახევას არ ვაპირებთ. მეხუთე რაუნდი იქნება, დიპლომატები როცა დანიშნავენ, ჩვენ მზად ვართ, მივიდეთ ამ შეხვედრაზე, რადგან ზუსტად ჩვენმა სწორმა, სახელმწიფოებრივმა და კონსტრუქციულმა პოზიციამ გამოიწვია ასეთი მხარდაჭერა საერთაშორისო ასპარეზზე.
კონგრესმენები, სენატორები პირდაპირ წერენ სრულ მხარდაჭერაზე ჩვენს მშვიდობიან პროტესტზე. ასევე, არის ევროპარლამენტში გამოსვლები. ამიტომ ჩვენ კონსტრუქციულად მივალთ, მაგრამ ამ შეხვედრაზე არის ძალიან მნიშვნელოვანი განსხვავებული წინაპირობა. ასეთი წინაპირობა ორია: პირველი, პირდაპირი რეკომენდაცია და მითითება სენატორებისა და კონგრესმენების მხრიდან და მეორე – ევროსაბჭოს რეზოლუცია, სადაც პირდაპირ ჩაიწერა, რომ მხარეებს შორის კომპრომისულად უნდა შეთანხმდეს საარჩევნო სისტემა. თუ ეს არ მოხდება, არჩევნების შეფასების დროს იქნება სწორედ ეს სახელმძღვანელო პრინციპი.
აქედან გამომდინარე, სხვა გზა გარდა იმისა, რომ კომპრომისზე წავიდეს, „ქართულ ოცნებას“ არ აქვს. აუცილებლად მოჰყვება საერთაშორისო დონეზე, არა მხოლოდ განცხადებები. არავის ეგონოს, რომ ეს წერილები მხოლოდ განცხადების საფრთხეს შეიცავს, ეს წერილები შეიცავს იმას, რომ პერსონალურად მათზე და არა სახელმწიფოზე აუცილებლად იქნება სანქციებიც, გაფრთხილებებიც, აკრძალვები ამ ქვეყნებში ჩასვლის და ძალიან ბევრი სხვა მექანიზმი, რომელსაც გამოიყენებენ“, – განაცხადა გიორგი ვაშაძემ.
ავტორი
ბეჟან ბერულავა