„ჩვენ ვუსმენდით გაბოროტებულ ადამიანს, რომელიც სრულად არის მოწყვეტილი რეალობას და ხალხის პრობლემებს,“ – ასე ეხმაურება „სტრატეგია აღმაშენებლის“ გენერალური მდივანი, პაატა მანჯგალაძე ირაკლი ღარიბაშვილის მიერ დღეს გაკეთებულ განცხადებებს.
როგორც ოპოზიციონერი დეპუტატი აღნიშნავს, ღარიბაშვილის თითოეული განცხადება მოწმობს, რომ ივანიშვილსა და მის პარტიას ხალხის პრობლემები არ აინტერესებს.
მანჯგალაძე ღარიბაშვილს კორუფციის განსახიერებას უწოდებს და ამბობს, რომ მათი რიტორიკა ძალაუფლების დაკარგვის შიშითაა გამოწვეული:
„ჩვენ ვუსმენდით გაბოროტებულ ადამიანს, რომელიც სრულად არის მოწყვეტილი რეალობას და ხალხის პრობლემებს. ნაცვლად იმისა, რომ მათგან ვისმენდეთ სინანულს, 12 წლის მანძილზე ქვეყანაში არსებული სიღარიბის, უმუშევრობის, მაღალი მიგრაციის გამო, კვლავ სიძულვილით კვებავენ საზოგადოებას.
ეს კიდევ ერთხელ მიუთითებს იმაზე, რომ ივანიშვილს და მისი პარტიის წევრებს არ აინტერესებთ ჩვენი მოქალაქეების, ხალხის პრობლემები და ნაცვლად ეკონომიკის გაძლიერებისა, ცდილობენ ჩაგვითრიონ სიძულვილის რიტორიკაში, რაც არ გამოუვათ, რადგან ჩვენთვის პრიორიტეტი არის ზუსტად ის საკითხები, რაზეც მოქალაქეები ქუჩაში, სხვადასხვა შეხვედრების დროს გვესაურებიან და სტკივათ.
ეს საკითხებია: მაღალანაზღაურებადი სამუშაო ადგილები, ოჯახების ეკონომიკური გაძლიერება და ემიგრანტების სახლში დაბრუნება, რაზეც არცერთი სიტყვა არ უთქვამს ივანიშვილის პარტიას.
ღარიბაშვილი არის ივანიშვილის პარტიის სიხარბისა და კორუფციის განსახიერება და როგორ შეიძლება ასეთი ადამიანების ხელისუფლებაში ყოფნა. ქართველმა ხალხმა მათ განაჩენი უკვე გამოუტანა და მათი ეს რიტორიკაც ძალაუფლების დაკარგვის შიშისგან არის გამოუწვეული“, – განაცხადა მანჯგალაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
