საქართველოს ავტო იმპორტიორთა ასოციაციამ და ავტომფლობელებმა ერთობლივი აქცია-პერფორმანსი გამართეს. პროტესტის მიზანი იყო, რომ იმ ავტო იმპორტიორებისა და ავტომფლობელების, რომელთა სატრანსპორტო საშუალება შეძენილი არის 2023 წლის 1 დეკემბრამდე, ობიექტური მიზეზების გამო 2024 წლის 1 იანვრამდე საქართველოს ტერიტორიაზე ვერ შემოვიდა, გამონაკლისის სახით, კანონით დადგენილი წესით, მიეცეთ კუთვნილი ავტომობილების რეგისტრაციის შესაძლებლობა.
რესპუბლიკის მოედნიდან პროტესტმა გარემოს დაცვისა და სოფლის მეურნეობის სამინისტროსთან გადაინაცვლა – მონაწილეებმა მსვლელობა მანქანების კოლონით განაგრძეს.
თემასთან დაკავშირებით სააგენტო ,,პარალელთან” კომენტარს აკეთებს ავტო იმპორტიორთა ასოციაციის თავმჯდომარე, ლაშა დარბაისელი:
,,ჩვენი მთავარი მოთხოვნა არის, რომ სახელმწიფომ გაითვალისწინოს ავტოიმპორტიორები და ავტომფლობელები, რომ ამ ადამიანებს არ მოუწიოთ კუთვნილი ავტომობილების დაშლა. არ უნდა დავუკარგოთ სატრანსპორტო საშუალებას მოძრაობის უნარი.
საზღვარგარეთიდან ჩამოყვანილი ავტომობილი გინდ ევროპიდან, გინდ ამერიკიდან, ბევრად უკეთეს მდგომარეობაშია, ვიდრე აქ, საქართველოში მოძრავი, 5-10 წლის, თუნდაც, ახალი წლოვანების ავტომანქანა.
მხოლოდ აკრძალვით პრობლემა არ გვარდება!“, – განაცხადა ლაშა დარბაისელმა.
ავტორი
ნინი ხიჯაკაძე
