„ლელომ“ კიდევ ერთხელ დაამტკიცა, რომ 9 რეკომენდაციის შესრულებასთან დაკავშირებული პროცესი მათთვის საინტერესო არ არის. როგორც 12-პუნქტიანი გეგმის მსვლელობაში მათ არანაირი მონაწილეობა არ მიუღიათ და საბოტაჟს ეწეოდნენ წელიწად-ნახევრის განმავლობაში და ფაქტობრივად სახე ჩამოსტიროდათ, ახლაც ამ პოლიტიკას აგრძელებენ და თუ რა შედეგს მოუტანს ასეთი პოლიტიკა, ამაზე ჩვენი საზოგადოება მათ საკადრის პასუხს გასცემს“, – ამის შესახებ პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე გივი მიქანაძემ ევროკავშირის 9 რეკომენდაციასთან დაკავშირებით პარლამენტში მიმდინარე შეხვედრაზე საუბრისას განაცხადა.
მისივე თქმით, „ლელომ“, გაკეთებული განცხადებით, კიდევ ერთხელ დაამტკიცა, რომ მათთვის პროცესი არ არის საინტერესო და მათი არჩევანია თუ როგორ იმოქმედებენ.
გივი მიქანაძის განმარტებით, სამუშაო შეხვედრაზე მაქსიმალური აქცენტი გაკეთდა იმ საკანონმდებლო ცვლილებებზე, რომელზეც პარლამენტმა საგაზაფხულო სესიის ფორმატში უნდა იმსჯელოს.
“პროცესი გრძელდება და იმ პასუხისმგებლით, რომელიც ჩვენი ქვეყნის და საზოგადოების წინაშე გვაქვს, მუშაობას გავაგრძელებთ. დარწმუნებული ვარ, წელს ძალიან მნიშვნელოვანი პროგრესი გვექნება. ჩვენი მთავარი მიზანია საქართველოს მაქსიმალურად სწრაფი წინსვლა ევროპულ ოჯახში თავისი ადგილის დასამკვიდრებლად“, – განაცხადა გივი მიქანაძემ.
ევროკავშირის 9 რეკომენდაციასთან დაკავშირებით პარლამენტში სამუშაო შეხვედრა მიმდინარეობს. შეხვედრას პარლამენტის თავმჯდომარე შალვა პაპუაშვილი, საპარლამენტო უმრავლესობის ლიდერი ირაკლი კობახიძე, საპარლამენტო უმრავლესობისა და ოპოზიციის წევრები, ასევე არასამთავრობო ორგანიზაციების წარმომადგენლები ესწრებიან.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
