“ქალბატონი დოდო სისტემამ დასაჯა, რადგან ჩათვალა, რომ საარჩევნო ყულაბის შემვსებად არ გამოადგებოდათ“, – ასე ეხმაურება „სტრატეგია აღმაშენებლის“ განათლების მიმართულების ხელმძღვანელი, ნანა ტოხვაძე სკოლიდან დირექტორის პოლიტიკური ნიშნით გარიყვის კიდევ ერთ ფაქტს.
მისი თქმით, აღნიშნულ საკითხზე სახალხო დამცველმა დისკრიმინაციის ფაქტი უკვე დაადგინა, თუმცა საქმის განხილვა მცხეთის რაიონულ სასამართლოში მე-4 წელია გრძელდება, სკოლას კი დირექტორი ისევ არ ჰყავს:
„დღეს, მცხეთის რაიონულ სასამართლოში გაიმართა მორიგი სხდომა. პროცესი მე-4 წელია მიმდინარეობს. სასამართლო დავა დაწყებულია სკოლის ყოფილი დირექტორის, ქალბატონი დოდო ჭოტორლიშვილის სარჩელის საფუძველზე, რომელიც სისტემას პოლიტიკური ნიშნით გათავისუფლებას ედავება.
ხაზგასასმელია, რომ მის მიმართ დისკრიმინაციის ფაქტი დაადგინა სახალხო დამცველმა. რაც ყველაზე სამწუხაროა, სკოლას, რომელსაც ქალბატონი დოდო ხელმძღვანელობდა, დღემდე არ ჰყავს დირექტორი.
მმართველი პარტიის გადაწყვეტილებით, წარმატებული, კომპეტენტური, გამოცდილი დირექტორი გაირიყა და სისტემამ დასაჯა, რადგან ჩათვალა, რომ საარჩევნო ყულაბის შემვსებად ქალბატონი დოდო არ გამოადგებოდათ და აბა, ბავშვების განათლება და ბედი ვის ადარდებს?! უნდა აღინიშნოს, რომ ქალბატონი დოდო ერთადერთი კანდიდატი გახლდათ ზაფხულში გამართულ დირექტორთა კონკურსზე, რომელიც კვლავ “დაიწუნეს”, როგორც სუს-ისგან პოლიტიკურად არალოიალობით დახასიათებული დირექტორი“, – განაცხადა ნანა ტოხვაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს