,,ლეიბორისტული” პარტიის თავმჯდომარე, შალვა ნათელაშვილი საგანგებო ბრიფინგზე განცხადებას აკეთებს რესპუბლიკური საავადმყოფოს შენობის დემონტაჟთან დაკავშირებით. ასევე, მწვავე პოზიციას აფიქსირებს ბიძინა ივანიშვილთან დაკავშირებით და მას კონკრეტულ ბრალდებებს უყენებს:
,,კაცობრიობას უნახავს არაერთი ეგზოტიკური მიდრეკილებების მქონე ოლიგარქი, მაგრამ ისეთი, როგორიც ჩვენ დაგვებედა, დამერწმუნეთ, ჯერ არავის უნახავს.
ივანიშვილი ბიზნესს აკეთებს კულტურული, საგანმანათლებლო, სარელაქსაციო, სამკურნალო ობიექტების ნგრევა-განადგურებით და მასზე თავისი მომგებიანი სტრუქტურების აღმართვით. ამის ჭეშმარიტი დადასტურება გახლავთ იპოდრომის მიტაცება, ვერეს ხეობის დანგრევა, ზოოპარკი, საცურაო აუზი, ახლა უკვე მიადგა ვაჟა-ფშაველაზე რესპუბლიკურ საავადმყოფოს, რომელიც არის მექა ისტორიული ჯანმრთელობის დაცვისა, სადაც მუშაობს ასეულობით მედიკოსი, რომელთაც გადაურჩენიათ ასიათასობით პაციენტი და რომელიც არის ქალაქის არქიტექტურული იერსახე.
მოტივაცია საერთოდ ,,აღმაფრთოვანებელია”, რომ თურმე ის ავარიული გახლავთ და უნდა დაინგრეს. მაშინ, როდესაც აღნიშნული ობიექტი 70-იან წლებში საბჭოთა კავშირის ბიუჯეტით აშენდა და გათვლილი გახლავთ ატომურ ომზე, რის შედეგადაც ის არ დაინგრევა.
სინამდვილეში, რა თქმა უნდა, ბიძინა ივანიშვილს დაგეგმილი აქვს ამ ტერიტორიაზე, საკმაოდ დიდ ფართზე, საცხოვრებელი ბინების და ცათამბჯენების მშენებლობა. ამისათვის უკვე მონახული ჰყავს ყალბი ინვესტორი, რომელიც ვითომ პანამიდან შემოიტანს ინვესტიციებს. იქ რაღაც პატარა სამედიცინო დაწესებულებას ააშენებენ და მიუგდებენ ხალხს – ,,აჰა, გეყოფათ ესეც, რაც იყო“.
მივმართავთ აშშ-ის სახელმწიფო დეპარტამენტის ანტიკორუფციულ ბიუროს – ივანიშვილის მიმართ სანქციების დადების დროს გაითვალისწინეთ, მათ შორის, ეს ქმედება, რასაც აკეთებს ხალხის ჯანმრთელობის ხარჯზე საკუთარი ბიზნეს-ინტერესებისათვის!
მივმართავთ ჯანმრთელობის დაცვის მსოფლიო ორგანიზაციას – განიხილეთ, გამოუშვით კომისია და ადგილზე ნახეთ ჯანმრთელობის დაცვის გენოციდი, რომელსაც ახორციელებს საქართველოს დიქტატორი, ბიძინა ივანიშვილი საკუთარი ჯიბისა და მილიარდებისათვის. სამწუხაროა, რომ 21-ე საუკუნეში, აი, ამ თემებზე გვიწევს საუბარი“, – განაცხადა შალვა ნათელაშვილმა.
ავტორი
ნინი ხიჯაკაძე
