ანალიტიკოსი, გია ხუხაშვილი სააგენტო ,,პარალელისთვის” მიცემულ კომენტარში საუბრობს ქართულ პოლიტიკაში ,,ქართული ოცნების” დამფუძნებლის ბიძინა ივანიშვილის დაბრუნებასთან დაკავშირებით და განმარტავს, თუ რამდენად შეცვალა ამ ფაქტმა პოლიტიკური რეალობა საქართველოში, საპარლამენტო არჩევნების პერიოდისთვის:
,,მე, საბოლოო ჯამში, პოზიტიურად შევაფასებდი ივანიშვილის პოლიტიკაში ლეგალიზაციას. ამას არ ჰქვია დაბრუნება, არამედ ეს არის ლეგალიზაცია. იმიტომ, რომ არც არსად წასულა.
პოზიტიურად შევაფასებდი იმიტომ, რომ საერთოდ ასე სჯობს – ნებისმიერი ადამიანი, ვინც გადაწყვეტილებებს იღებს, შესაბამისად, პასუხისმგებელიც იყოს ამ გადაწყვეტილებებზე. ივანიშვილს ჰქონდა ისეთი პოზიცია, როდესაც იღებდა გადაწყვეტილებას, მაგრამ პასუხისმგებლობას საკუთარ თავზე არ იღებდა. შესაბამისად, ბურუსით მოცული ვითარება გვქონდა ქვეყანაში. მისი ინსტიტუციონალიზაცია, შესაბამისად, მისასალმებელია. ეს აძლევს ოპოზიციასაც ფოკუსის გასწორების საშუალებას – უკვე სამიზნე ვინ არის, იციან.
ივანიშვილი გადაწყვეტილებებს იღებდეს და შენ ღარიბაშვილთან გქონდეს პრეტენზიები – არასწორია, ბოლო-ბოლო უსამართლოა. ამომრჩევლისთვისაც გაუგებარია – ვინ? რა? როგორ და საიდან? საბოლოო ჯამში, მე მაინც პოზიტიურად შევაფასებდი ბიძინა ივანიშვილის ამ ნაბიჯს.
მე ვფიქრობ, რომ ოპოზიციამ ახლა ფოკუსი უნდა გაასწოროს, ამ ახალ რეალობას შეეგუოს და შესაბამისად, თავისი ძირითადი გზავნილები შეცვალოს. ნაკლები ილაპარაკოს ჩრდილოვან მმართველობაზე და მეტი ილაპარაკოს ხალხის რეალურ პრობლემებზე. ოპოზიციის პრობლემა ის კი არ არის, რომ ცუდად ხსნიან, ,,რომ ხელისუფლება ცუდია“, თვითონ რომ კარგები არიან – ამას ვერ უხსნიან ამომრჩეველს. რაღაცა პოზიტიური დღის წესრიგი ჩამოაყალიბონ და დაარწმუნონ ამომრჩეველი, რომ ისინი უკეთესად მართავენ ამ ქვეყანას, ვიდრე არსებული ხელისუფლება“, – განაცხადა გია ხუხაშვილმა.
ავტორი
ნინი ხიჯაკაძე
