განათლების ყოფილი მინისტრი, პოლიტიკის ექსპერტი გია ნოდია საქართველოს ეკლესიის გადაწყვეტილებას ეხმაურება, სამების ტაძარში დასვენებული ხატიდან სტალინის გამოსახულებიანი ფრაგმენტის ამოშლასთან დაკავშირებით:
“მარჩიელობის საგანი გახდა, რატომ მიიღო საპატრიარქომ მოულოდნელი გადაწყვეტილება, წმ. მატრონას ხატიდან სტალინის გამოსახულება ამოეშალა და ამით ექსტემისტული ჯგუფები გაენაწყენებინა.
ასეთ შემთხვევაში პირველ რიგში უნდა ვთქვათ, რომ ცალსახა პასუხი არ გვაქვს. თუ ვინმეს პრეტენზია აქვს, რომ ეს იცის, უნდა შეძლებოდა, საპატრიარქოს ეს ნაბიჯი ეწინასწარმეტყველებინა. ასეთი არავინ ვიცი.
მაგრამ შეგვიძლია ჩამოვთვალოთ შესაძლო პასუხების ვარიანტები. ასეთი ჩემი აზრით, ორია: (1) გადაწყვეტილება პატრიარქმა ილია მეორემ მიიღო საკუთარი ინიციატივით ან მისი გარემოცვის რჩევით; (2) ეს იყო ხელისუფლების რჩევა, რასაც ეკლესია დაეთანხმა. სხვა ვარიანტი არ მაფიქრდება.
ხელისუფლებას და ეკლესიას შორის ურთიერთობის დინამიკა ჩვენი პოლიტიკური სისტემის ერთ-ერთი საკვანძო და საინტერესო ფაქტორია. „ოცნება“ და ეკლესია პარტნიორები არიან, მათ ერთმანეთი ძალიან სჭირდებათ, ამიტომ ორივეს აქვს ერთმანეთზე გავლენის ბერკეტი. ეს გადაწყვეტილება ჰგავდა გარიგებას: ეკლესია ხატიდან მოაშორებს სტალინს, ხელისუფლება გაამკაცრებს რელიგიური სიწმინდეების ხელშეუხებლობის კანონს.
არ ვიცი, ამ ორი ვარიანტიდან რომელია სწორი. მაგრამ საკონტროლო კითხვები ასეთი უნდა იყოს: ვის უქმნიდა მეტ უხერხულობას საზოგადოების რეაქცია ეკლესიაში სტალინის განდიდებაზე? ამ ეტაპზე, ვის პოლიტიკაში უფრო ჯდება ექსტრემისტული ჯგუფებისგან დისტანცირება (თუკი მათი რეაქცია წინასწარ გათვლილი იყო)?“, – წერს ფეისბუქის პირად გვერდზე გია ნოდია.
