“სტრატეგია აღმაშენებლის” პოლიტიკური საბჭოს წევრი, პარტიის სოციალური მიმართულების ხელმძღვანელი, თეონა ჭალიძე ირაკლი ღარიბიშავილის მიერ დაანონსებულ სოციალურ პროგრამას ეხმიანება, რომელიც 1000 მრავალშვილიანი ოჯახისთვის ორი წლის განმავლობაში საცხოვრებლით უზრუნველყოფას გულისხმობს და ამისთვის 50 მილიონი ლარია გამოყოფილი:
“პირველ რიგში უნდა აღინიშნოს, რომ სახელმწიფოს არ აქვს უსახლკაროთა ერთიანი ბაზა და შესაბამისად ნებისმიერი პროექტი, რომელიც ამ მიმართულებით განხორციელდება, იქნება ფრაგმენტული და არა სისტემური, რაც მის ეფექტიანობაზე აისახება.
მხოლოდ მრავალშვილიანებზე აქცენტი არ არის სწორი, რადგან შესაძლოა მარტოხელა დედა ორი შვილით უფრო მძიმე მდგომარეობაში იყოს, ვიდრე მრავალშვილიანი რომელიმე სხვა ოჯახი. შესაბამისად უსამართლო იქნება ის, რომ ვისაც უფრო მეტად სჭირდება ის შეიძლება დარჩეს ამ სიის მიღმა.
ვის შეეხება პროგრამა – კრიტერიუმები ბუნდოვანია რადგან, თუ ისინი ხელმძღვანელობენ სოციალური მომსახურების ბაზით, სოციალურად დაუცველის სტატუსით და შესაბამისი ქულებით ეს არაა საკმარისი იმიტომ, რომ ამ პროგრამის მიღმა დარჩენილია ბევრი ძალიან მოწყვლადი ჯგუფის წარმომადგენელი, რომელსაც სოციალურად დაუცველის სტატუსი მხოლოდ იმიტომ არ აქვს, რომ ერთი კონკრეტული საცხოვრებელი ადგილი არ გააჩნია, შესაბამისად, მისი შეფასება ვერ ხდება და ამის გამო ყველანაირი დახმარების სერვისის გარეშეა დარჩენილი.
ობიექტურად არის რისკები, რომ ყოველივე ეს წინასაარჩევნო მიზნებისთვის ხომ არ იქნება გამოყენებული, რადგანაც კრიტერიუმების ბუნდოვანების გამო შესაძლოა ნეპოტიზმით იქნეს შერჩეული ოჯახები ან პარტიული ნიშნით, რაც ძალიან დიდი პრობლემაა და ბიუჯეტიდან როცა იხარჯება თანხა, რა თქმა უნდა, მეტი გამჭვირვალობა და სიცხადეა საჭირო”, – განაცხადა თეონა ჭალიძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
