გარდაცვლილი ჟურნალისტის, ქეთი ბერძენიშვილის დედა, მაგული ჩხობაძე საგანგებოდ გამართულ პრესკონფერენციაზე ბოკერიას სახელობის საუნივერსიტეტო ჰოსპიტალის ექიმების მიმართ მოითხოვს გამოძიების დაწყებას, თუ რამდენად სწორად ჩატარდა ოპერაცია და შემდგომი პაციენტის მკურნალობის პერიოდი:
,,3 საათში მეუბნებიან, რომ ,,ოპერაცია დამთავრდა, ექიმი ქვევით გელოდებათ“. ჩავედი და პირველი რაც მითხრა – ,,მაგარ შარში ვართ, მე ეს ოპერაცია ვერ გავაკეთე“.
იმავე დღესვე დაიწყო მწვავე ანთებითი პროცესი სანაღვლე გზებში. ,,ავიღოთ სისხლის სტერილობაზე”, – 5 დღე ვეხვეწებოდი… 5 დღის შემდეგ აიღეს. კიდევ 5 დღის შემდეგ ველოდებოდი პასუხს. აღმოჩნდა, რომ ეს სისხლი დაკარგულია, ჩაბარებული არ არის. ქეთის მდგომარეობა მძიმდება… ხელახლა ავაღებინე და ასე, საშუალოდ 2 კვირაში მივიღეთ, რომ არის კლეფსიელა, რომელიც ამ კლინიკას აქვს, როგორც ჰოსპიტალური ინფექცია.
მოვიკითხე – ,,ჩემი ექიმი სად არის?!” მითხრეს, რომ ,,წასულია კორეაში და 26 აგვისტომდე არ იქნებაო“.
53 წელია ექიმი ვარ, მსგავსი შემთხვევა არც გამიგონია, რომ დატოვო პაციენტი – მძიმე, სადაც ოპერაცია ვერ შეასრულე, ვერ გააკეთე… პაციენტი მძიმდება… და არ ვიცი სად არის ჩემი ექიმი…“, – იხსენებს მაგული ჩხობაძე.
ინფორმაციისთვის: ჟურნალისტი ქეთი ბერძენიშვილი 8 ნოემბერს გარდაიცვალა.
ავტორი
ნინი ხიჯაკაძე
