“პირდაპირ ჩანს, რომ რუსეთი ოკუპაციიდან ანექსიის სტრატეგიაზე გადავიდა და ამას აკეთებს არა მარტო მარიონეტული ხელისუფლების დახმარებით, არამედ საქართველოს უმოქმედო ხელისუფლების ხელშეწყობითაც“, – ასე გამოეხმაურა „სტრატეგია აღმაშენებლის“ გენერალური მდივანი, პაატა მანჯგალაძე გავრცელებულ ინფორმაციას, რომ ბიჭვინთის აგარაკები შესაძლოა პუტინის საკუთრებაში გადავიდეს.
მისი თქმით, ბიჭვინთა საქართველოს სუვერენული ტერიტორიაა და საქართველოს ხელისუფლების უმოქმედობა ეროვნულ პოზიციად ვერ ჩაითვლება:
„პირდაპირ ჩანს, რომ რუსეთი ოკუპაციიდან ანექსიის სტრატეგიაზე გადავიდა და ამას აკეთებს არა მარტო მარიონეტული ხელისუფლების დახმარებით, არამედ საქართველოს უმოქმედო ხელისუფლების ხელშეწყობითაც.
მე არ ვამბობ, რომ რაიმე დიდი ზემოქმედება შეგვიძლია, მაგრამ საერთაშორისო თვალსაზრისით, ყველამ ვიცით, რომ ბიჭვინთა არის საქართველოს სუვერენული ტერიტორია. როცა ამის შესახებ განცხადებაც არ კეთდება, ეს ეროვნულ პოზიციად ვერ ჩაითვლება.
ეს არის ყველაზე მეტად სამწუხარო და ნამდვილად იქნება საჩუქარი, რომ აფხაზეთის ლამაზი კუთხის, ლამაზი ნაწილი, პუტინის პირად საკუთრებად გადაიქცეს“, – განაცხადა პაატა მანჯგალაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
