“რაც შეეხება თავმჯდომარისა და წევრების არჩევისთვის გაწერილ ახალ პროცედურას, ვენეციის კომისია დამაბნეველს უწოდებს და ამბობს, რომ არსებობს საფრთხე – ისევ ერთი პარტიის მიერ შერჩეული თავმჯდომარე და წევრები მივიღოთ”, – ასე გამოეხმაურა ცესკო-ს წევრი “სტრატეგია აღმაშენებლიდან” ანა კობახიძე ვენეციის კომისიის მიერ საარჩევნო ადმინისტრაციასთან დაკავშირებით გამოქვეყნებულ დასკვნას.
მისი თქმით, თავმჯდომარისა და წევრების არჩევის წესი ბუნდოვანია, რასაც ვენეციის კომისიის აღნიშნული განცხადებაც პირდაპირ ცხადჰყოფს:
“ვენეციის კომისიის და ODIHR-ის დასკვნაში რამდენიმე პუნქტში ხაზგასმით არის ნახსენები დაბალი ნდობა საზოგადოებაში საარჩევნო პროცესის და საარჩევნო ადმინისტრაციისადმი ამომრჩევლების მხრიდან. ამას მოწმობს ასევე ბოლო წლებში ჩატარებული საზოგადოებრივი აზრის კვლევებიც.
რეკომენდაციაში საუბარია, რომ რეფორმა უნდა მოიცავდეს წინა წლების რეკომენდაციების გათვალისწინებას, იგი უნდა იყოს ყოვლისმომცველი და გამჭვირვალე, რაც შემდგომ უზრუნველყოფს სწორედ ნდობის დაბრუნებას.
რაც შეეხება თავმჯდომარისა და წევრების არჩევისთვის გაწერილ ახალ პროცედურას, კომისია დამაბნეველს უწოდებს და პირდაპირ ამბობს, რომ არსებობს საფრთხე ისევ ერთი პარტიის მიერ შერჩეული თავმჯდომარე და წევრები მივიღოთ.
გაცემულ რეკომენდაციაში პირდაპირ წერია, რომ ე.წ. ,,შარლ მიშელის” დოკუმენტს უნდა დავუბრუნდეთ, სადაც კარგად არის გაწერილი როგორ შეიძლება გვყავდეს კონსესუსური პირები ასეთ მნიშვნელოვან თანამდებობებზე”, – განაცხადა ანა კობახიძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს