“გონს მოეგონ, გამოფხიზლდნენ, იქნებ გაიგონ, რომ ამ ქვეყანაში რევოლუცია არ გამოვა!” – ირაკლი ზარქუა ოპოზიციას მიმართავს

საფინანსო საბიუჯეტო კომიტეტის თავმჯდომარის მოადგილე, ირაკლი ზარქუა ჟურნალისტებთან კომენტარს აკეთებს საქართველოსთვის კანდიდატის სტატუსის მინიჭებასთან დაკავშირებით და ამ ეტაპის შემდეგ, თუ როგორ უნდა გაგრძელდეს რეკომენდაციების შესრულების პროცესი:

,,თქვენ იცით, რომ ჩვენ უკვე დაწყებული გვაქვს მზადება. ერთი უკვე ავსახეთ, მათ შორის, იურიდიული პირების მხრიდან დაფინანსების შეზღუდვა პოლიტიკური საქმიანობისა და პარტიების. დანარჩენი რეკომენდაციები რაც არის, ჩვენ მზად ვართ, რომ შემდეგ წელს ეს ბოლომდე მივიყვანოთ, უკვე დაწყებული გვაქვს.

რაც შეეხება სამუშაო ჯგუფებში თანამშრომლობას, როგორც მაშინ მოვუწოდებდით და ვურჩევდით, რომ ჩართულიყვნენ, ახლაც ზუსტად იგივე განწყობა გვაქვს.

მე დიდად არ მჯერა, ეს რადიკალები რომ ჩაერთვებიან. იმიტომ, რომ მათი ამოცანა, სტრატეგია სულ სხვა არის, მაგრამ კიდევ ერთხელ მივცემთ შანსს, შესაძლებლობას, რომ იქნებ გონს მოეგონ, გამოფხიზლდნენ და მათი დამკვეთებიც, ვინც ამ ქაოსისა და არეულობის უკან დგანან, იქნებ გაიგონ, რომ ამ ქვეყანაში რევოლუცია არ გამოვა!“, – განაცხადა ირაკლი ზარქუამ.

ავტორი
ნინი ხიჯაკაძე