ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია youtube-ის საკუთარ პლატფორმაზე ვრცელ ინტერვიუში საუბრობს საქართველოს მე-3 პრეზიდენტის პატიმრობის საკითხსა და მიხეილ სააკაშვილის როლზე ქართულ პოლიტიკურ სივრცეში:
,,არანაირი კავშირი მიშა სააკაშვილის პატიმრობასა და საქართველოს ევროპულ პერსპექტივას შორის, უბრალოდ, ბუნებაში არ არსებობს.
[ჟურნალისტის შეკითხვა]: თუმცა, არიან ცალკეული დეპუტატები, რომლებიც რაღაცებს ამბობებ.
ცალკეული დეპუტატები ბევრგან არიან, მათ შორის, საქართველოშიც, რომლებიც იძახიან ,,გამოუშვით მიშა სააკაშვილი“.
საერთო ჯამში, ნებისმიერი ქვეყნისთვის პრეზიდენტის პატიმრობა ყოველთვის რეპუტაციული პრობლემაა, მაგრამ რეპუტაციული პრობლემაა, როდესაც პრეზიდენტი მოქალაქეობას იცვლის და სხვა ქვეყანაში პოლიტიკურ კარიერას აგრძელებს. რეპუტაციული პრობლემაა, როდესაც ამ პრეზიდენტის პოლიტიკური პარტია ამბობს, რომ ,,გამოუშვით, არა და ვერ მიიღებთ ქვეყნისთვის კრიტიკულად მნიშვნელოვან ევროპულ პერსპექტივას“. ასევე, როდესაც ვიღაც ამბობს, რომ ,,თურმე მიშა სააკაშვილის გამოშვება შეიძლება დეპოლარიზაციის მიზნით“, პირიქით იქნება – მთელი პრობლემაა იმაში, რომ სააკაშვილის გამოშვება ქვეყნის პოლიტიკური პროცესის რადიკალიზაციას გამოიწვევს.
ამიტომ ჩვენი ჰუმანიტარული პოზიციის მიუხედავად, რომელიც იმაში მდგომარეობს, რომ, რა თქმა უნდა, სახელმწიფომ უნდა უზრუნველყოს მისი ჯანმრთელობა და სიცოცხლის უფლება, მაგრამ მე არ ვთვლი, რომ დღეს პრეზიდენტმა მიხეილ სააკაშვილი უნდა შეიწყალოს. მიუხედავად იმისა, რომ ეს პრეზიდენტის გადასაწყვეტია, მისი დისკრეციული უფლებაა, მე არანაირი უფლება არ მაქვს მას რაიმე ამაში ვურჩიო, მაგრამ ქართულ პოლიტიკურ პროცესზე მას არანაირი პოზიტიური, პირიქით – ნეგატიური ზეგავლენა ექნება.
უფრო მეტსაც გეტყვით, მე ვერ ვხვდები რა ახსნა აქვს, ან რით ხელმძღვანელობს დღევანდელი ხელისუფლება, როდესაც მიშა სააკაშვილს აძლევს უფლებას, ფაქტობრივად, საარჩევნო კამპანია აწარმოოს სასამართლო დარბაზიდან. ფაქტობრივად, პოლიტიკური პარტია სასამართლო დარბაზიდან მართოს, ადამიანმა, რომელიც საქართველოს მოქალაქე საერთოდ არ არის.
კიდევ ერთხელ ხაზგასმით ვამბობ, რომ ჰუმანიტარული საკითხი უნდა გადაწყდეს ისე, როგორც ნორმალურ, დემოკრატიულ ქვეყანას შეეფერება. მისი ჯანმრთელობა და სიცოცხლის უფლება უნდა იყოს დაცული ყველაგან – საავადმყოფოშიც და სასჯელაღსრულების დაწესებულებაშიც. თუ ეს ადამიანი ჯანმრთელია, მაშინ გადაიყვანეთ სასჯელაღსრულების დაწესებულებაში. თუ არ არის ჯანმრთელი და მას მკურნალობთ, მაშინ აგვიხსენით, როგორ აძლევთ მას შესაძლებლობას სასამართლო დარბაზიდან პოლიტიკური კამპანია აწარმოოს?!“, – განაცხადა გიორგი გახარიამ.
ავტორი
ნინი ხიჯაკაძე
