მიმდინარე პოლიტიკურ პროცესებთან დაკავშირებით და ოპოზიციის გეგმებზე საუბრობს “ახალი საქართველოს” თავმჯდომარე, გაერთიანებული ოპოზიციის ერთ-ერთი ლიდერი გიორგი ვაშაძე: ოპოზიციონერი ლიდერი იანვრიდან საერთო ეროვნული წინააღმდეგობის მოძრაობის დაწყებას აანონსებს და მიაჩნია, რომ ივანიშვილის ხელისუფლებას მართველობის მხოლოდ რამდენიმე თვე დარჩა:
„ჩვენ უკვე მივაღწიეთ რამდენიმე გამარჯვებას, შევძელით და საერთო ენა გამოვნახეთ ყველა ახალგაზრდულ ჯგუფთან, რომლებიც განსაკუთრებულად აქტიურობენ. სადაც არ უნდა მივიდეთ, მოსახლეობა ყველგან უმძიმეს კრიზისზე საუბრობს და „ქართული ოცნებისგან“ მოითხოვს კონკრეტულ პასუხებს კითხვებზე.
თუ არ მივიღებთ პასუხებს, ჩვენ გვაქვს გეგმა და გაცილებით მწვავე ვიქნებით. მთელი საქართველო იანვრიდან ფეხზე დადგება, ჩვენ დავიწყებთ საერთო ეროვნული წინააღმდეგობის მოძრაობას, რომელიც მოედება ყველა ქალაქს, სოფელსა თუ ოჯახს.
ჩვენ გვიყვარს სამშობლო და ამიტომაც ვდგავართ აქციებზე, მათ კი მხოლოდ და მხოლოდ თანამდებობები შეუყვარდათ. ჩვენ გვჯერა საქართველოს მომავლის, ისინი კი ფიქრობენ, რომ საქართველოდან ხალხი უნდა გადაასახლონ და მხოლოდ თვითონ უნდა დარჩნენ ამ ქვეყანაში საცხოვრებლად. ჩვენ გვჯერა, რომ შეგვიძლია ისეთი რეფორმები გავატაროთ ქვეყანაში, რომელიც ყველა გაჭირვებულ ადამიანს ხელს გაუმართავს, ისინი კი ფიქრობენ ერთადერთს, რომ ჩვენს ხარჯზე ბევრი ფული იშოვონ. ჩვენ გვიყვარს ჩვენი შვილები და მათთვის გვინდა ეს ქვეყანა, მათ კი უნდათ, რომ მათი შვილები საზღვარგარეთ წავიდნენ და ქართველი ხალხის ხარჯზე ნაშოვნი ფულებით დააფინანსონ, ეს კი უსამართლობაა.
მე მჯერა, რომ საქართველოს აქვს დიდი მომავალი. მე მჯერა, რომ ყველა პენსიონერს ექნება ღირსეული ადგილი ქვეყანაში, მილიონზე მეტ სამუშაო ადგილს ვიპოვით და დავასაქმებთ სამუშაოს მაძიებელ ქართველებს. მე მჯერა რომ ქართველი ახალგაზრდობა აქ შეძლებს მიიღოს განათლება და აქედან შეეხმიანება გლობალურ სამყაროს.
პირობას ვდებ თქვენს წინაშე, რომ ივანიშვილის ხელისუფლებას რამდენიმე თვე დარჩა და მათ მმართველობას, როგორც საშინელ წარსულს ისე გავიხსენებთ. საქართველო აღარ დაუშვებს რუსული ბნელი ძალების გამარჯვებას ჩვენს ქვეყანაში“ – აცხადებს გიორგი ვაშაძე.
