საქართველოს პრემიერ-მინისტრმა, ირაკლი ღარიბაშვილმა ჟურნალისტებთან კომენტარი გააკეთა საკონსტიტუციო სასამართლოს გადაწყვეტილებაზე, სადაც გამოაცხადეს, რომ პრეზიდენტის მიერ კონსტიტუციის დარღვევას ადგილი ჰქონდა:
,,რაც შეეხება სასამართლოს გადაწყვეტილებას – ეს, რა თქმა უნდა, არის სამწუხარო ფაქტი, ვინაიდან დადასტურდა, რომ ქვეყნის, ჩვენი სახელმწიფოს მეთაური, ქალბატონი სალომე არის დადასტურებულად კონსტიტუციის დამრღვევი.
მე, როგორც ამ ქვეყნის პრემიერ-მინისტრს და რიგით მოქალაქეს, ნამდვილად არ მიხარია. მე არ მინდა, რომ ჩემი ქვეყნის პრეზიდენტი იყოს კონსტიტუციის დამრღვევი.
იმის მაგივრად, რომ პრეზიდენტს ეჩვენებინა და სხვებისთვის მაგალითი მიეცა – სხვა საჯარო მოხელეებისთვის, თუ შემდგომი პრეზიდენტებისთვის, რომ იგი უნდა ყოფილიყო ყოველთვის ქვეყნის, კანონის და მთავარი კანონის, კონსტიტუციის დაცვის სადარაჯოზე, ამის ნაცვლად ქალბატონმა სალომემ უხეშად, დემონსტრაციულად, არაერთგზის დაარღვია კონსტიტუცია.
[ჟურნალისტის შეკითხვა]: ელოდებით თუ არა რომ საქართველოს პრეზიდენტი ოპოზიციაში წავა? მან თქვა, რომ ,,ქართულმა ოცნებამ“ მერე თვითონ გადაწყვიტოს ურჩევნია მე თავისუფალი პოლიტიკოსი ვიყო თუ ერჩივნა, რომ ვყოფილიყავი პრეზიდენტი.
გვეტყობა ჩვენ, რომ ან ვნერვიულობთ, ან გვეშინია ვინმეს ოპოზიციონერობის?! შევახსენებ ყველას, რომ სალომე ზურაბიშვილს 1%-იანი რეიტინგი ჰქონდა, როცა იყო ოპოზიციაში. 1%-იანი რეიტინგი ჰქონდა! ,,ქართულმა ოცნებამ“ ეს ადამიანი მოიყვანა და დასვა პრეზიდენტად.
[ჟურნალისტის შეკითხვა]: 1% თუ ჰქონდა, როგორ დასვა?
– ,,ქართული ოცნების“ რეიტინგის დამსახურებით!“, – განაცხადა ირაკლი ღარიბაშვილმა.
ავტორი
ნინი ხიჯაკაძე
