თბილისის მთავარი ანძა ისრაელის დროშის ფერებში განათდა, ამ ქვეყნის მიმართს საქართველოს სოლიდარობის ნიშნად, იმ მძიმე, ტრაგიკული მოვლენებიდან გამომდინარე, რაც “ჰამასის” ისრაელზე ტერორისტულ თავდასხმას მოჰყვა
აღნიშნულ ფაქტს, ასევე, ეხმაურება ისრაელში საქართველოს ელჩი, ლაშა ჟვანია და საქართველოს სახელით სრულ მხარდაჭერას უცხადებს ისრაელს, ებრაელ ხალხს:
“საქართველოს დედაქალაქის მთავარი ანძა ისრაელის დროშის ფერებში განათდა! ეს, ქართველი ერის თქვენს გვერდით დგომის სიმბოლოა!
ისრაელს აქვს უფლება და ეჭვგარეშეა, რომ დაიცავს თავს, მაგრამ, ისრაელს, ისევე როგორც ყველა ცივილურ სახელმწიფოს, არა მხოლოდ დღევანდელი დღის დაცვის, არამედ საკუთარი მოსახლეობის და სახელმწიფოებრიობის მომავალში მშვიდი ცხოვრების უზრუნველყოფის უფლება აქვს. ასეც იქნება!
ეს უმძიმესი გასაჭირი ჩაივლის და ისრაელი კიდევ უფრო ძლიერად გააგრძელებს არსებობას!
თქვენი მეგობარი საქართველო და ქართველი ერი კვლავ თქვენთან ერთად გაიზიარებს თქვენს სიხარულს, რომელიც მომავალში მრავლად გექნებათ ჩვენო ერთგულო ისრაელის ერო!” – წერს ფეისბუქის პირად გვერდზე ლაშა ჟვანია.
ინფორმაციისთვის:
“თბილისის ანძა ისრაელის სახელმწიფო დროშის ფერებში განათდა
სოლიდარობა ისრაელს! – ისრაელის მხარდაჭერის ნიშნად, თბილისის ანძა ისრაელის სახელმწიფო დროშის ფერებში განათდა.
„ვგმობთ იმ სასტიკ ძალადობას, რაც მშვიდობიან მოსახლეობას დაატყდა თავს. ვუსამძიმრებ გარდაცვლილთა ოჯახებს, მთელს ისრაელს!“
– აღნიშნული გზავნილებით თბილისი თანადგომას უცხადებს ისრაელის სახელმწიფოს და ისრაელელ ხალხს“, – ნათქვამია თბილისის მერიის მიერ გავრცელებულ ინფორმაციაში.
