“ქართულ ოცნებას” განსაკუთრებით ეშინია “სტრატეგია აღმაშენებლის”, ამიტომაც დაიწყეს ჩვენი პარტიის წევრებზე სანქციების დაწესება პარლამენტში – “სტრატეგია აღმაშენებელი”

პოლიტიკური პარტია „სტრატეგია აღმაშენებელი“ პარლამენტში მიმდინარე პროცესებთან დაკავშირებით საგანგებო განცხადებას ავრცელებს.
განცხადებაში აღნიშნულია, რომ ბოლო პერიოდში „სტრატეგია აღმაშენებლის“ წევრები და აპარატის თანამშრომლები მიზანმიმართული თავდასხმების მსხვერპლნი არიან, რაც მათი მხრიდან ხელისუფლების რეალური სახის მხილებითაა განპირობებული.

„სტრატეგია აღმაშენებელში“ ამბობენ, მიუხედავად „ქართული ოცნების“ არაერთი მცდელობისა, ისინი კვლავ გააგრძელებენ ბრძოლას ქვეყნის გარუსების წინააღმდეგ:

„შემთხვევითი არ არის, რომ “ქართულ ოცნებას” განსაკუთრებით ეშინია „სტრატეგია აღმაშენებლის“ რადგან დღეს ჩვენ, „ნაციონალური მოძრაობისა“ და „სტრატეგია აღმაშენებლის“ კოალიცია ვართ ის, ვინც ყოველდღიურად ვამხელთ „ქართული ოცნების“ მავნებლობებს, რეალური ქმედებებით ვეწინააღმდეგებით მათ და ვქმნით რეალურ ალტერნატიულ ძალას.

სწორედ ამ მიზეზით უკრძალავენ სერგო ჩიხლაძეს ჟურნალისტებთან ურთიერთობას და ტრიბუნასთან დგომას;

სწორედ ამ მიზეზით დაიწყეს ლაშა დიაროვსა და გიორგი ხაბურზანიას მიმართ დისციპლინური წარმოება;

სწორედ ამ მიზეზით გაუუქმეს ცესკო-ს წევრს, ანა კობახიძეს პარლამენტის საშვი.

წარმოიდგინეთ, მაშინ როდესაც ამერიკაში, კონგრესის შენობაში შესვლა ხდება უსაშვოდ, ყოველგვარი ნებართვის გარეშე, აქ „ქართული ოცნება“ აწესებს ისეთ რეგულაციებს, რომ ხან დეპუტატებსაც კი გვიჭირს პარლამენტის შენობაში შემოსვლა.

“ქართულმა ოცნებამ“ კარგად იცოდეს, რომ რამდენიც არ უნდა ეცადონ, ვერ გაგვაჩერებენ, ყველა ბერკეტს გამოვიყენებთ, რომ ვამხილოთ და შევაჩეროთ მათი მიზანმიმართული მავნებლობები ქვეყნის წინააღმდეგ. ამასთან, ხელისუფლებას უნდა ახსოვდეს ისიც, რომ რაც არ უნდა რკინის ბარიერი აღმართოს მასსა და ხალხს შორის „ქართული ოცნების“ დამარცხება იქნება გარდაუვალი, რადგან ქართველი ხალხი არ დაუშვებს ამ ქვეყნის გარუსებს”, – ნათქვამია “სტრატეგია აღმაშენებლის” მიერ გავრცელებულ განცხადებაში

ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” საზოგადოებასთან ურთიერთობის სამსახური ავრცელებს