პარტია ,,ქართული ოცნების” თავმჯდომარე, ირაკლი კობახიძე ჟურნალისტებთან კომენტარს აკეთებს პრეზიდენტ სალომე ზურაბიშვილის მიერ განხორციელებულ და დაგეგმილ ვიზიტებზე ევროპელ ლიდერებთან. მისი განმარტებით, ეს არის კონსტიტუციის პირობების უხეში დარღვევა, როდესაც ამგვარი შეხვედრები ხორციელდება საქართველოს მთავრობის თანხმობის გარეშე:
[ჟურნალისტის შეკთხვა]: – სალომე ზურაშვილმა საგანგებო განცხადება გააკეთა ,,პირველი არხის“ ეთერში და აღნიშნა, რომ საკუთარი ხარჯებით გააგრძელებს ვიზიტებს სხვადასხვა ქვეყანაში. თქვენი აზრით, რას ემსახურება მისი ეს განცხადება?
,,მე არ ვიცი, ვინ ურჩია ეს მას, როდესაც საკონსტიტუციო სასამართლოში განსახილველია იმპიჩმენტის საკითხი. ეს არის პირდაპირი აღიარება. რა თქმა უნდა, მას რომ გაეწია ბიუჯეტის ხარჯი, არაკონსტიტუციურ ვიზიტთან მიმართებით, გარდა კონსტიტუციის დარღვევისა, ეს იქნებოდა სისხლის სამართლის დანაშაულიც. ამიტომ არ გასწია მან ბიუჯეტიდან ხარჯი.
თუმცა, კიდევ ერთხელ გავიმეორებ, რომ ეს არის მისი მხრიდან პირდაპირ, საჯარო აღიარება იმისა, რომ მას შეცნობილი ჰქონდა მისი ვიზიტის არაკონსტიტუციური შინაარსი და ამიტომ არ გასწია ბიუჯეტიდან ხარჯები.
შესაბამისად, ეს იყო ძალიან კარგი საჩუქარი საკონსტიტუციო სასამართლოში პროცესის წინ. მან პირდაპირ აღიარებითი ჩვენება მისცა სასამართლოს, იმასთან დაკავშირებით, რომ ის განზრახ, მიზანმიმართულად არღვევდა კონსტიტუციას, და რომ არღვევდა – ეს ისედაც დღესავით ნათელია.
ასევე, მან პირობა დადო, რომ გააგრძელებს კონსტიტუციის უხეშ დარღვევას, რაც შემაშფოთებელია. პრეზიდენტი უნდა იყოს პირველი, ვინც იცავს კონსტიტუციას, როდესაც ის ასე პირდაპირ აცხადებს, რომ გააგრძელებს კონსტიტუციის უხეშად დარღვევას, ეს სრულიად მიუღებელია“, – განაცხადა ირაკლი კობახიძემ.
ავტორი
ნინი ხიჯაკაძე
