პოლიტიკური პარტია „სტრატეგია აღმაშენებლის“ გენერალური მდივანი და „გამარჯვების პლატფორმის“ ერთ-ერთი ლიდერი, პაატა მანჯგალაძე „ნაციონალური მოძრაობის“ წევრებთან ერთად ჩოხატაურში მოსახლეობას ხვდება.
როგორც ოპოზიციონერი დეპუტატი აღნიშნავს, თავისუფალ მოქალაქეებზე ძალადობა არავის შერჩება. მისივე თქმით, მიმდინარე პროცესები პირდაპირ ასახავს „ქართული ოცნების“ რეალურ სახეს:
“ჩვენ, დღეს, “გამარჯვების პლატფორმის” ლიდერები, თავისუფლების მოყვარე მოქალაქეებთან ერთად, ჩოხატაურიდან ხელისუფლებას, მის ყველა მოძალადესა და კორუმპირებულ ჩინოვნიკს ვუგზავნით გზავნილს, რომ ეს მათ უნდა ეშინოდეს ხალხის.
არავის არ უნდა გაუჩნდეს განცდა, რომ შერჩება ძალადობა და მათ მიერ ხალხის ძარცვა. წარმოგიდგენიათ ხელისუფლების და მისი ჩინოვნიკების სიხარბე, როცა 21-ე საუკუნეში, დღისით ჩოხატაურში ისაკუთრებენ ნოდარ დუმბაძის სახელობის სკვერს. ეს არის ფსკერი, ეს არის “ქართული ოცნების” გაუმაძღრობის პირდაპირი გამოვლინება.
რუსობა, სიხარბე, ძალადობა – ესაა ხელისუფლების მთავარი სახე და ნიშანი. რა თქმა უნდა, ეს მას არ შერჩება, ხალხი ყოველთვის იბრუნებს იმას, რაც მისია”, – განაცხადა პაატა მანჯგალაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
