15 აგვისტოს, შავი ზღვის საკონცერტო დარბაზში ,,Black Sea Arena”-ზე ,,The killers”-ის კონცერტი გაიმართა. ჯგუფის სოლისტმა დამსწრე აუდიტორიიდან, მუსიკალური ნომრის შესასრულებლად, რუსი დრამერი სცენაზე აიყვანა, რასაც ღონისძიების მონაწილეების მხრიდან პროტესტი მოჰყვა, ხოლო დამსწრეთა ნაწილმა კონცერტიც კი დატოვა.
აღნიშნულ სკანდალთან დაკავშირებით ,,Black Sea Arena”-მ სოციალურ ქსელში პოსტი გამოაქვეყნა, სადაც აღნიშნული ჯგუფის მიერ მიღებულ გადაწყვეტილებას გაემიჯნა: ,,გვესმის ჩვენი სტუმრების ემოციების. არტისტის მოქმედება სცენაზე არ არის Black Sea Arena-ს პოზიცია. ვიაზრებთ ჩვენს წილ პასუხისმგებლობას, გულწრფელად ვიხდით ბოდიშს და გიზიარებთ არტისტის პასუხს მომხდართან დაკავშირებით.
რუსეთი ოკუპანტია 🇬🇪“, – წერია მათი ფეისბუქის გვერდზე.
ამ ინცინდენტის შემდეგ ,,The killers”-მა განცხადება გაავრცელა, სადაც მომხდარის გამო ბოდიში მოიხადა:
,,საქართველოს კეთილო ხალხო, ჩვენი მიზანი ვინმესთვის შეურაცხყოფის მიყენება არასდროს ყოფილა! დიდი ხანია ტრადიცია გვაქვს, რომლის თანახმადაც, ხალხს დრამებზე დასაკრავად ვიწვევთ. სცენიდან ჩანდა, რომ დამსწრე საზოგადოების რეაქციიდან გამომდინარე, ერთ-ერთი მათგანის სცენაზე ამოყვანა და მონაწილეობის მიღება პრობლემას არ წარმოადგენდა.
გავაანალიზეთ, რომ კომენტარი რომლის თანახმადაც, ,,The killers”-ის აუდიტორია და მხარდამჭერები “და-ძმები” არიან, შეიძლება არასწორად გამოვხატეთ. არავის განაწყენება არ გვსურდა, ამისთვის ბოდიშს ვიხდით. თქვენ გვერდით ვართ და იმედია მალე დავბრუნდებით“, – წერს ,,The killers”.
ავტორი
ნინი ხიჯაკაძე
