ანტიკონსტიტუციური და ჩვენთვის მიუღებელია ოპოზიციის მიერ პარლამენტში დარეგისტრირებული გერმანული მოდელის ვარიაცია – თეა წულუკიანი

151

როგორც ჩანს, საარჩევნო საკითხებთან დაკავშირებით, დიპლომატების ჩართულობით გამართული ხელისუფლებისა და ოპოზიციის წარმომადგენლების დიალოგის არც მეორე რაუნდი დასრულდა რაიმე კონკრეტული შედეგით. როგორც შეხვედრის დასრულების შემდეგ განაცხადა იუსტიციის მინისტრმა – ოპოზიციის მიერ შეთავაზებული გერმენული მოდელის ვარიაცია მიუღებელია ხელისუფლებისთვის. თუმცა თეა წულუკიანი, ასევე, არ გამორიცხავს შეხვედრის მორიგ რაუნდს, რათა განხილული იქნას დღეს წამოჭრილი საკითხები:

შეხვედრა ვერაფერი კონკრეტული შეთანხმებით, რაიმე არსებით საკითხზე, ვერ დასრულდა. საუბარი საკმაოდ გრძელი იყო და დრო წაიღო იმაზე მსჯელობამ, რომ ჩვენ, კიდევ ერთხელ, მეორე მხარეს, მედიატორების ჩართულობით ავუხსენით ის, რომ ჩვენთვის გერმანული მოდელი, მათ შორის ოპოზიციის მიერ არის დარეგისტრირებული პარლამენტში, არის ანტიკონსტიტუციური და ჩვენ მათ ვუხსნიდით, რომ ეს არის მიუღებელი.

მეორე ნაწილი დისკუსიის ეხებოდა იმას, რომ საერთაშორისო პარტნიორებმა დააყენეს წინადადება, ორივე მხარის წინაშე, – ხომ არ გვემსჯელა მხარეებს იმაზე, რომ არსებული კონსტიტუციის ფარგლებში, სადაც საქართველოს პარლამენტი არის ნახევრად მაჟორიტარული და ნახევრად პროპორციული და არა სრულად პროპორციული, როგორც ამას ითხოვს ოპოზიცია, ერთი ნახევარი იყოს არა ერთმანდატიანი მაჟორიტარული, არამედ მრავალმანდატიანი მაჟორიტარული, ოღონდ არსებული კონსტიტუციის ფარგლებში.

მე ვფიქრობ, რომ კიდევ ერთი შეხვედრა გაიმართება იმაზე, რომ დღეს წამოჭრილი საკითხები განვიხილოთ. 

ვერავითარი კომპრომისი, ვერავითარი შეთანხმება დღეს ვერ შედგა.

გერმანული მოდელის ოპოზიციური ვარიაცია, რომელიც დარეგისტრირებულია საქართველოს პარლამენტში, არ შეესაბამება საქართველოს კონსტიტუციას.

დაველოდოთ ეუთო/ოდირის დასკვნას, თუმცა რაც შეეხება გათვალისწინებას, ჩვენ ვთვლით, რომ ოდირი არ არის საკონსტიტუციო ორგანო და ჩვენი მყარი პოზიციაა, რომელიც გადასინჯვას არ ექვემდებარება, რომ გერმანული მოდელი ან მისი ვარიაცია, რომელიც რეგისტრირებულია პარლამენტში, არ შეესაბამება ქართულ კონსტიტუციას,” – განაცხადა თეა წულუკიანმა.

კომენტარები