ანალიტიკოსი ალექსი ნონიაძე შოვში მომხდარ ტრაგედიასთან დაკავშირებით ხელისუფლებისა და ცალკეული ექსპერტების თუ თანამდებობის პირების მხრიდან გაკეთებულ კონკრეტულ შეფასება-განმარტებებს ეხმაურება:
“ძალიან დიდი მნიშვნელობა აქვს შოვში მოხდარი სტიქიის გამომწვევი მიზეზები დეტალურად დადგინდეს. მომხდარის შელამაზება და გაკეთილშობილება კიდევ მრავალი ტრაგედიების გამეორების ტოლფასი იქნება.
მაგალითად, თუ ფილტვების ანთებით ავადმყოფს ექიმი დიაგნოზით დაუდგენს სეზონურ გაციებას, შესაბამისად მკურნალობაც გაციების და არა ფილტვების ანთების ადექვატური იქნება, რაც პაციენტისთვის ნამდვილად შეღავათი ვერ იქნება.
თუ პრობლემას თვალებში პირდაპირ არ ჩავხედეთ და პასუხისმგებლობა ვერ გავიაზრეთ, ვერც მომხდარისგან სწორ დასკვნებს ვერ გავაკეთებთ. საგანგებო სიტუაციების მართვა ბევრად უფრო მნიშვნელოვანი თემაა ვიდრე რაღაც პოლიტტექნოლოგიები. პროპაგანდამ შეიძლება ადამიანებზე იმოქმედოს, მაგრამ არა ზვავზე, მეწყერსა და წყალდიდობაზე. სტიქია მხოლოდ ბუნების კანონებს ექვემდებარება. ამიტომ ჩვენ უნდა მოვერგოთ მეწყერს და არა პირიქით. თუ ამ მარტივ ჭეშმარიტებას ვერ ვიაზრებთ არ ვიცი მაშინ რა გვეშველება…“, – წერს ფეისბუქის პირად გვერდზე ალექსი ნონიაძე.