,,ღია საზოგადოების ფონდის” ლიდერობით, 9 ორგანიზაციამ მოამზადა შეფასების დოკუმენტი – სტატუსმეტრი, სადაც საუბარია, თუ როგორ მიდის საქართველოში ევროკომისიის 12 რეკომენდაციის შესრულება. მართლმსაჯულების რეფორმასთან დაკავშირებით კომენტარი გააკეთა ორგანიზაცია ,,სასამართლოს გუშაგის” დამფუძნებელმა, ნაზი ჯანეზაშვილმა:
,,ანგარიშიდან დღემდე, ფაქტობრივად, არაფერი შეცვლილა. შეიძლება ითქვას, რომ გარკვეული კუთხით სიტუაცია გაუარესებულიც კი არის. პირველ რიგში მინდა აღვნიშნო, რომ გამოქვეყნდა ეუთო/ოდირის მოსაზრება, ამ შემთხვევაში არის ძალიან ბევრ პრობლემაზე საუბარი, მათ შორის, არის სასამართლოს თავმჯომარეებზე, იუსტიციის უმაღლეს საბჭოში გადაწყვეტილების მიღებაზე, მოსამართლის როლზე.
ის პრინციპები, რითიც აქამდე სასამართლო იმართებოდა – კორპორატიზმი, ნეპოტიზმი, მეგობრობით, კლანური წესებით – გრძელდება და შეიძლება ითქვას, რომ ბოლო რამდენიმე კვირაში კიდევ უფრო თვალსაჩინო გახდა.
ხელისუფლება ბოლო პერიოდში, მაგალითად, ირაკლი კობახიძე აცხადებს, რომ მათ სჭირდებათ კონკრეტიკა სასამართლო რეფორმასთან დაკავშირებით. თუ მათ ექნებოდათ მეტი ინფორმაცია, როგორც ის ამბობს, უფრო მეტ ცვლილებას განახორციელებდნენ.
აქ მინდა, რამდენიმე საკითხზე გავამახვილო ყურადღება. პირველი – არის ვენეციის კომისიის რამდენიმე მოსაზრება, მეორე – უკვე 2 მოსაზრება გამოქვეყნებულია ეუთო/ოდირის მიერ. ასევე, არსებობს ადგილობრივი ორგანიზაციების მიერ გამოქვეყნებული ანგარიშები – დასკვნები და რეკომენდაციები საერთო სასამართლო სისტემასთან დაკავშირებით. პრობლემები, შეიძლება ითქვას, რომ ფაქტობრივად, ყველაფერი არის ზედაპირზე“, – განაცხადა ნაზი ჯანეზაშვილმა.
ავტორი
ნინი ხიჯაკაძე
