გუშინ, ბათუმის პორტში რუსული საკრუიზო ლაინერით რუსი ტურისტების შემოსვლას, მოსახლეობის მხრიდან პროტესტი მოჰყვა. აღნიშნულთან დაკავშირებით, იმავე საღამოს, ტელეკომპანია ,,იმედის” გადაცემაში ,,იმედი live” მწვავე და კრიტიკული შეფასებები გააკეთა პარტია ,,ქართული ოცნების” თავმჯდომარემ, ირაკლი კობახიძემ. მისი განმარტებით, საქართველოს სჭირდება პრაგმატული და რაციონალური პოლიტიკა, რათა ქვეყანა არ დაზარალდეს:
,,დღეს, რაც ვიხილეთ, ეს არის უბრალოდ ქაჯობა. მე მინდა შეგახსენოთ, რომ ამ ქაჯობამ ქვეყანას ძალიან მძიმე შედეგები მოუტანა სხვადასხვა დროს. ეს იყო 90-იანი წლების დასაწყისი თუ შედარებით გვიანდელი პერიოდი, 2004-2012 წლები, მათ შორის, 2008 წელი.
ჩვენ ხშირად ვიხსენებთ ხოლმე იმას, რომ ,,ქართული ოცნების” ხელისუფლება არის ერთადერათი ხელისუფლება, რომლის დროსაც ქვეყანას ომი არ ჰქონია. ყველა წინა ომი, რა თქმა უნდა, აგრესორი იყო რუსეთი თავის დროზე, იგივე 90-იან წლებში, 2008 წელს, მაგრამ ყველა შემთხვევაში, როდესაც პრობლემები ექმნებოდა ჩვენს ქვეყანას, ეს მათ შორის, იყო ხოლმე იმ ქაჯობის შედეგი, რომელიც ჩვენი ქვეყნის წარმომადგენლების მხრიდან, ფორმალურად როგორც არის, ხორციელდებოდა.
იგივე ადამიანები ცდილობენ, რომ დღეს ეს ქაჯობა ოპოზიციის რიგებიდან დააბრუნონ საქართველოში და ამით საქართველოს პრობლემები შეუქმნან. ჩვენ, რა თქმა უნდა, ამას არ დავუშვებთ. ჩვენ არ გვჭირდება ქაჯური პოლიტიკა, არამედ გვჭირდება პრაგმატული, რაციონალური, სწორი პოლიტიკა ჩვენი ქვეყნისთვის”, – განაცხადა ირაკლი კობახიძემ.
ავტორი
ნინი ხიჯაკაძე
