“ივნისის ბოლომდე, რისი გაკეთებაც იყო შესაძლებელი, ყველაფერი გაკეთდა” – ირაკლი კობახიძე ევროკომისისს 12 რეკომენდაციის შესრულებაზე

პარტია ,,ქართული ოცნების” თავმჯდომარე, ირაკლი კობახიძე ჟურნალისტებთან კომენტარს აკეთებს ევროკომისიის 12 რეკომენდაციის შესრულების პროცესზე და აცხადებს, რომ შესასრულებელი მხოლოდ 3 რეკომენდაცია დარჩა, მათ შორისაა სასამართლოს რეფორმა, რაზეც ითხოვენ კონკრეტულ განმარტებებს, თუ რა იგულისხმება ფართო რეფორმაში:

,,რაც შეეხება აგენტებს – ამასთან დაკავშირებით ჩვენი პოზიცია არის ცნობილი, ვის ვგულისხმობთ აგენტების ქვეშ. ეს არის კარგად ცნობილი საზოგადოებისთვის. აქ იგულისხმებიან ის სუბიექტები, რომლებიც არიან ჩართული ანტისახელმწიფოებრივ საქმიანობაში.

რა თქმა უნდა, ეს არ ეხება არასამთავრობო სექტორს, როგორც ასეთს. არის რამდენიმე ყველაზე მდიდარი ენჯეო, რომლებიც პირდაპირ არიან ჩართულნი ანტისახელმწიფოებრივ ქმედებებში. ისინი სცენაზე იდგნენ და სცენიდან ითხოვდნენ პირდაპირ მთავრობის გადადგომას, რაც არ არის არასამთავრობო ორგანიზაციის საქმე.

ივნისის ბოლომდე, რისი გაკეთებაც იყო შესაძლებელი, ყველაფერი გაკეთდა. რჩება კანონმდებლობასთან დაკავშირებით 3 რეკომენდაცია. ერთი ეხება სასამართლო რეფორმას, უფრო ფართო რეფორმას. ამაზე ჩვენ ვითხოვთ კონკრეტიკას.

ჩვენ არ ვიცით ამაში რა იგულისხმება. ჯერ-ჯერობით არ უთქვამთ არც ევროკავშირიდან, რას გულისხმობენ უფრო ფართო სასამართლო რეფორმაში. როგორც კი გვექნება კონკრეტიკა ამასთან დაკავშირებით, მაშინვე დაიწყება მსჯელობა. სწორედ იმიტომ ვერ შესრულდა ეს პუნქტი, რომ არ ვიცოდით რა იგულისხმებოდა მასში კონკრეტულად”, – განაცხადა ირაკლი კობახიძემ.

ავტორი
ნინი ხიჯაკაძე