აქონდროპლაზიის დიაგნოზით დაავადებული ბავშვების მშობლები კვლავ მიმართავენ ჯანდაცვის სამინისტროს, რომ მიაწოდონ ზუსტი ინფორმაცია, როდის მიიღებენ მათი შვილები სამკურნალო მედიკამენტს. თემასთან დაკავშირებით მშობლებმა ჟურნალისტებთან თავიანთი პოზიცია დააფიქსირეს:
,,ვადები მუდმივად იწევს. ჩვენც მუდმივად გვაქვს იმის განცდა, რომ შესაძლებელია დროში ისე გაიწელოს, რომ რამდენიმე ბავშვისთვის საერთოდ აზრიც დაკარგოს მკურნალობამ.
ვთხოვთ ჩვენ მთავრობას, ჯანდაცვის სამინისტროს, პარასკევამდე გვითხრას, დაგვისახელოს გონივრული ვადა, ოფიციალურად დაგვიდასტურონ, რომ მაქსიმუმ 30 სექტემბრამდე ბავშვები მედიკამენტს მიიღებენ“, – განაცხადა მაკუნა გოჩიაშვილმა.
,,იმედს ვიტოვებთ, რომ ეს პროტოკოლი დღეს დასრულდება და ჩვენი შვილები სექტემბერში მიიღებენ მედიკამენტს, არა უგვიანეს 30 რიცხვისა.
დღეს, ჩვენ არ ვართ საპროტესტო რეჟიმში, არ ვართ პროტესტის მომხრე, ჩვენ ვართ დედები, რომლებიც ვითხოვდით და ვითხოვთ შვილის ჯანმრთელობისთვის ერთად-ერთ უალტერნატივო მედიკამეტს ,,ვოზორიდიტს“, – განაცხადა ქეთევან ბეგიაშვილმა.
“მე მინდა პრემიერს, მივმართო და მშობლების თხოვნა-მუდარა გავაცნო, რომ ჩაერთოს ამ პროცესში. თვალ-ყური ადევნოს და დააჩქაროს პროცესი. ბავშვებს აუცილებლად ესაჭიროებათ ეს წამალი და არაუგვიანეს სექტემბრისა მიიღონ. თუ ეს არ მოხდება, ჩვენ ისევ გავაგრძელებთ 24-საათიან პროტესტს,” – აცხადებს ეკატერინე ჭონქაძე.
ავტორი
ნინი ხიჯაკაძე
