“რა იყო არასწორი…” – ნიკა გვარამია 3 კონკრეტულ გადაწყვეტილებაზე მიხეილ სააკაშვილის საქმესთან დაკავშირებით

მიხეილ სააკაშვილის ყოფილი ადვოკატი, “მთავარი არხის” დამფუძნებელი, ნიკა გვარამია თავის პოზიციას აფიქსირებს მე-3 პრეზიდენტის საქმესთან დაკავშირებით და 3 კონკრეტულ არასწორ გადაწყვეტილებაზე ამახვილებს ყურადღებას:

“რა იყო არასწორი:

1. არ უნდა მოხსნილიყო/გაბუნდოვანებულიყო მთავარი ხაზი – პოლიტპატიმრობა და არაჰუმანური მოპყრობა და არ მომხდარიყო სრულად გადართვა ჯანმრთელობის მიმდინარე მდგომარეობაზე;
2. არ უნდა ყოფილიყო განცხადებები მიშას საქართველოს პოლიტიკიდან წასვლაზე – ან რატომ უნდა წავიდეს, ან რისთვის გაკეთდა ეს განცხადებები საერთოდ, თეორიულადაც ვერაფრის მომტანი, უკუეფექტის გარდა;
3. სტრასბურგში დროებითი ღონისძიების მოთხოვნა იყო, ჩემის აზრით, მცდარი. უარი ამაზე 99%ით პროგნოზირებადი იყო სტრასბურგის პრაქტიკის გათვალისწინებით, და არა იმის გამო, რომ სააკაშვილის მდგომარეობა სტრასბურგმა მძიმედ არ მიიჩნია. სასამართლოს უარი კი სწორედ ასე “გაყიდა” ოცნების პროპაგანდამ – “სტრასბურგმა დაადგინა, რომ არაფერი არ ჭირს”, რაც ცხადია ტყუილია, მაგრამ იმუშავა“, – წერს ფეისბუქის პირად გვერდზე ნიკა გვარამია.