სოციოლოგიის დოქტორი იაგო კაჭკაჭიშვილი კონკრეტულ საკითხებზე ამახვილებს ყურადღებას და ხელისუფლების პროპაგანდის შესახებ შეფასება-განმარტებებს აკეთებს:
“რაც უფრო მეტ წარმატებას მიაღწევს უკრაინა (და ცივილიზებული მსოფლიო) ფრონტზე და დასუსტდება რუსეთი, მით უფრო შემცირდება ხელისუფლების პროპაგანდა ე.წ. „მეორე ფრონტის“ და „ომის გარდაუვალობის“ შესახებ – აქტიური დასავლური ორიენტაციის საპასუხოდ.
შესაბამისად, დადგება (პრინციპში, უკვე დადგა!) „აბა ომი გინდათ?“ პროპაგანდისტული და შიგნიდან გამოფიტული ეროვნული მეტანარატივის ჩანაცვლების დრო. ასეთი „დიდი ბუები“ ხელისუფლებას სასიცოცხლოდ სჭირდება, რათა სოციალური და ეკონომიკური პრობლემებიდან და ევროინტეგრაციის კონსტიტუციური ვალდებულებიდან ყურადღება გადაიტანოს ეროვნული იდენტობის ფსევდო-საფრთხეებზე და, ამ გზით, კვლავ შეინარჩუნოს ძალაუდლება.
რა იქნება ასეთი ჩამნაცვლებელი მეტანარატივი? უკვე აშკარად ჩანს, რომ ეს იქნება LGBT გამოცდილების დემონიზება, თითქოს ეს გამოცდილება წალეკვით ემუქრება საქართველოს აწმყოს და, რაც მთავარია, მომავალს. „გლობალური ომის პარტიის“ მსგავსად, შეიქმნება მითი „გლობალური LGBT ერთობის“ შესახებ, რომელსაც მიზანში აქვს საქართველოს გაქრობა. ამის მკაფიო ნიშნები უკვე სახეზეა – შარლ პეროს გადმოქართულებული ზღაპრის ეროვნულ უბედურებად დასახვის წარმოუდგენელი აბსურდი ამაზე მეტყველებს.
2020 წელს „გარეჯი საქართველოას“ პროპაგანდისტული და ამორალურად ცრუ მეტანარატივით შეძლო ქართულმა ოცნებამ ძალაუფლების დაჭერა, ახლა იგივე სურთ LGBT თემის დემონიზების ნიადაგზე.
ცალკე ამბავია, გამოუვა თუ არა ეს ხელისუფლებას ისეთივე წარმატებით, რაც ყველა დანარჩენი. მოკლედ ვიტყვი: იმდენად შეუთავსებელია ერთმანეთთან ევროინტეგრაცია და „გლობალური LGBT ერთობის“ კულტივირება, რომ საქართველო აუცილებლად დარჩება ევროინტეგრაციის გაღმა ნაპირზე. ხოლო ეს, დიდი ალბათობით, გადაიყოლებს ხელისუფლებას“, – წერს ფეისბუქის პირად გვერდზე იაგო კაჭკაჭიშვილი.
