“ახალი საქართველოს” პოლიტსაბჭოს წევრი, თამთა შამათავა ტურიზმის ეროვნული ადმინისტრაციის მიერ საქართველოს აეროპორტებში ტურისტებისათვის ღვინის დარიგების ფაქტს ეხმიანება და აღნიშნავს, რომ ეს ინიციატივა “ახალი საქართველოს” გუნდმა და გიორგი ვაშაძემ რამდენიმე თვის წინ გააჟღერა, თუმცა ეს არ იყო მხოლოდ ღვინის გადაცემა:
“ხელისუფლებისგან ჩვენი გუნდის მიერ გაჟღერებული ინიციატივების მითვისება ახალი ამბავი არ არის. ამჯერად, ტურიზმის ეროვნული სააგენტოს გადაწყვეტილებით, ტურისტებს აეროპორტში ერთ ბოთლ ღვინოს გადასცემენ. ეს ინიციატივა “ახალი საქართველოს” გუნდმა და გიორგი ვაშაძემ რამდენიმე თვის წინ გააჟღერა, თუმცა ეს არ იყო მხოლოდ ღვინის გადაცემა. ეს იყო სტუმრის ბარათის კონცეფცია, რომელიც რამდენიმე ინიციატივას აერთიანებდა.
სტუმრის ბარათის მიზანი ვიზიტორებისათვის მოტივაციის გაზრდა და მსგავსი კომუნიკაციით საქართველოში კვლავ ჩამოსვლის სურვილის გაჩენა იყო. ამავდროულად, სტუმრის ბარათით ვიზიტორი საქართველოს რეგიონებში მცირე ზომის სასტუმროში უფასოდ გაათევდა ღამეს. ამით სახელმწიფო ერთგვარად წაახალისებდა რეგიონებში ვიზიტორების ნაკადების ზრდას. აღნიშნული ბარათი კიდევ არაერთ ბენეფიტს მოიცავდა.
სამწუხაროა, რომ ტურიზმის ადმინისტრაციამ მთელი კონცეფციიდან მხოლოდ ღვინის ბოთლი დაიმახსოვრა. მივესალმებოდით, იდეა სრულყოფილად რომ განხორციელებულიყო. ნაწილობრივ, ფრაგმენტულად გაკეთებული საქმე ვერ მოგვცემს იმ ბენეფიტებს და დადებით ეფექტს, რაც ჩვენს ქვეყანას სჭირდება ამ მიმართულებით“, – აცხადებს თამთა შამათავა.
