„სტრატეგია აღმაშენებლის“ ლიდერები გიორგი ვაშაძე და სერგო ჩიხლაძე ვაშინგტონში უმაღლესი დონის შეხვედრებს აგრძელებენ. სენატი, კონგრესი, სახელმწიფო დეპარტამენტი, ატლანტიკური საბჭო, კვლევითი ორგანიზაციები – ეს იმ ინსტიტუციათა არასრული ჩამონათვალია, სადაც „სტრატეგია აღმაშენებლმა“ შეხვედრები გამართა.
პარტიის საგარეო მდივნის, სერგო ჩიხლაძის თქმით, დიდია ინტერესი საქართველოს მიმართ, რასაც აღნიშნული მაღალი რანგის შეხვედრებიც მოწმობს. ოპოზიციონერი ლიდერის თქმით, დასავლელი პარტნიორები ყურადღებით აკვირდებიან საქართველოში მიმდინარე პროცესებს და მთავარ იმედს პროდასავლურ ოპოზიციურ ძალებზე ამყარებენ:
„აშშ-ში სრულდება ჩვენი, „სტრატეგია აღმაშენებლის“, ვიზიტი. ყველა წამყვან ინსტიტუციაში გვქონდა უმაღლესი დონის შეხვედრები – სენატი, კონგრესი, სახელმწიფო დეპარტამენტი, კვლევითი ორგანიზაციები, საექსპერტო ორგანიზაციები და ერთადერთი დასკვნა არის ის, რომ უდიდესი ყურადღება არის საქართველოს მიმართ და ასევე ამერიკელი პოლიტიკოსები ეძებენ საყრდენს საქართველოში, რადგან „ქართული ოცნება“ არ არის და ვერ იქნება საყრდენი ჩვენი დასავლელი პარტნიორების, ამიტომ ისინი, რა თქმა უნდა, ძირითად იმედებს პროდასავლურ, დემოკრატიულ, ოპოზიციურ ძალებზე ამყარებენ.
ამაზე მეტყველებს ის მაღალი რანგის შეხვედრები, რაც გიორგი ვაშაძესა და „სტრატეგია აღმაშენებელს“ მოუწყვეს, ასევე ის, რომ გიორგი ვაშაძე სპეციალური სტუმრის სტატუსით ესწრება საკომიტეტო მოსმენებს და პირადად მასპინძლობენ კონგრესმენები.
ფაქტია, რომ დიდია ყურადღება საქართველოს მიმართ და განსაკუთრებით დიდ ფსონს დებენ პროდასავლურ ოპოზიციურ ძალებზე, რომლებმაც უნდა შეცვალონ „ქართული ოცნების“ პრორუსული ხელისუფლება“, – განაცხადა სერგო ჩიხლაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს