საპარლამენტო უმრავლესობის ლიდერმა, ირაკლი კობახიძემ პარლამენტის სასესიო დარბაზში დღეს მომხდარ ინციდენტს პროვოკაცია უწოდა:
„ყველაზე სამწუხარო ის არის, რომ შეზღუდული შესაძლებლობების ბავშვები გამოიყენეს ამ პროვოკაციისთვის.
ეს აჩვენებს იმ ადამიანების სახეს, რომლებიც ბოლშევიკური მეთოდებით ცდილობენ რაღაც მიზნების მიღწევას. ეს არის კოლექტიური ნაცმოძრაობა. ძალიან სამწუხაროა, რა თქმა უნდა, ეს ყველაფერი.
ბუნებრივია, კატეგორიულად მიუღებელია ასეთი პროვოკაციები, განსაკუთრებით მაშინ, როდესაც ხდება შეზღუდული შესაძლებლობების მქონე ბავშვების გამოყენება“, – განაცხადა ირაკლი კობახიძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
ინფორმაციისთვის: პარლამენტის პლენარულ სხდომაზე, ერთ-ერთმა მოქალაქემ დარბაზში “ქართული ოცნების” დეპუტატებს რუსული რუბლები გადმოაყარა, რასაც ემოციური გაგრძელება მოჰყვა და პარლამენტში ტექნიკური შესვენება გამოცხადდა.