მუსიკისმცოდნე მაია გოგორიშვილი სოციალურ ქსელში პოსტს აქვეყნებს პიანისტ ირმა გიგანის მორიგ წარმატებაზე საფრანგეთში გამართულ პიანისტთა მეორე საერთაშორისო კონკურსზე “ფორტეპიანოს ვარსკვლავები” და მასთან დაკავშირებით საინტერესო მოსაზრებებს აფიქსირებს:
“ქართველმა პიანისტმა ირმა გიგანმა საფრანგეთში გამართულ პიანისტთა მეორე საერთაშორისო კონკურსზე “ფორტეპიანოს ვარსკვლავები” ლაურეატის წოდება მოიპოვა. მას „კონკურისის აღმოჩენა” უწოდეს. ძალიან სასიხარულოა, როდესაც შენი ქვეყნის შვილს, 23 წლის ულამაზეს პიანისტს ევროპის მუსიკალური საზოგადოება ასეთი ეპითეტით შეამკობს.
რატომ გამოარჩიეს ირმა გიგანი? მე შევეცდები ჩემი მოკრძალებული ანალიზით ავხსნა, თუ რა განსაკუთრებული თვისებები აქვს ამ უნიჭიერეს პიანისტს.
მინდა გითხრათ, რომ პროფესია – პიანისტი საკმაოდ რთულია. ყველამ ვიცით, რომ ეს პროფესია უდიდეს შრომას მოითხოვს, მაგრამ იმისთვის, რომ გამორჩეული გახდე, დიდ ნიჭთან ერთად, კიდევ, რაღაც უხილავი გჭირდება. ის, რაც ყველასგან გამოგარჩევს, რასაც ვერავინ გასწავლის, თუ განგებამ არ მოგცა.
ირმა გიგანს ბავშვობიდან უწოდეს „ პატარა მოცარტი“, ხშირად ხდება რომ ბავშვობაში მიღწეული წარმატებები ასაკთან ერთად ქრება. მაგრამ ირმა გიგანი იმ იშვიათ ხელოვანთა რიგშია რომელმაც განავითარა ნიჭი და აღქმა რაღაც უხილავ სხვა განზომილებაში გადაიყვანა.
უნდა აღინიშნოს მისი განსაკუთრებული ინტერპრეტირების უნარი, ნაწარმოების სრული კონცეფტუალური აღქმა, კომპოზიტორის არსის მსმენელამდე სწორად მიტანა, ფილოსოფიური გააზრება, პირადი ინდივიდუალიზმი და გულწრფელი ემოცია. ეს ყველაფერი კი ერთად ქმნის მუსიკისა და პიროვნების ჰარმონიულობას. ეს არის ჭეშმარიტი ხელოვნება. წელს ირმა გიგანი საფრანგეთში კონკურსის აღმოჩენა გახდა და ვიმედოვნებ რომ სულ მალე იგი არამარტო საფრანგეთის, არამედ მსოფლიოს ფავორიტი გახდება”, – აღნიშნავს მაია გოგორიშვილი.
