“პრეზიდენტს ესმის, რომ მისმა კონკრეტულმა ქმედებებმა შეიძლება გამოიწვიოს კონფრონტაცია აღმასრულებელ ხელისუფლებასთან” – გია ხუხაშვილი

ანალიტიკოსი გია ხუხაშვილი სააგენტო ,,პარალელთან“ ინტერვიუში კონკრეტულ მოსაზრებას აფიქსირებს იმასთან დაკავშირებით, თუ რატომ არ შეიწყალა დღემდე პრეზიდენტმა, სალომე ზურაბიშვილმა მედიამენეჯერი, ნიკა გვარამია და რა შანსებია, მომავალში რომ შეიწყალოს:

,,პრეზიდენტის პოზიცია, საერთოდ მისი მოღვაწეობის განმავლობაში, გასაგებია. ის აფიქსირებს თავის შეხედულებებს, მაგრამ კონკრეტულ ქმედებებში არასოდეს არ გადაჰყავს. იმიტომ, რომ ესმის – მისმა კონკრეტულმა ქმედებებმა შეიძლება გამოიწვიოს კონფრონტაცია აღმასრულებელ ხელისუფლებასთან.

როგორც ჩანს, გარკვეული კომპლექსი ამასთან დაკავშირებით აქვს. თუმცა, ახლა ესკალაციის ხარისხი ისეთია, რომ პრინციპში ვერ გამოვრიცხავთ. თეორიულად შეიძლება წარმოვიდგინოთ, რომ როგორც კი ბოლო ინსტანციაშიც ნიკა გვარამიას უარი ეთქმევა, უნდა ვივარაუდოთ, რომ უარი ეთქმევა უზენაეს სასამართლოში, ამის შემდეგ კიდევ ერთხელ დადგება მისი შეწყალების საკითხი და თეორიულად ასეთი შესაძლებლობა არსებობს”, – განაცხადა გია ხუხაშვილმა.

ავტორი
ნინი ხიჯაკაძე