პარლამენტში ჩატარებულ სკანდალურ კენჭისყრაზე პოლიტიკური შეფასებები კეთდება. მმართველი პარტია აღნიშნავს, რომ იმ ოპოზიციონერ დეპუტატებზე, რომლებმაც კენჭისყრაში მიიღეს მონაწილეობა, მიმდინარეობს ბულინგი. აღნიშნულთან დაკავშირებით შეფასებებს აკეთებს პარლამენტის დეპუტატი, პარტია “სტრატეგია აღმაშენებლის” წევრი, პაატა მანჯგალაძე და საპარლამენტო უმრავლესობას კონკრეტულ ფაქტებს შეახსენებს:
“სამარცხვინო და აბსურდულია კობახიძის და მდინარაძის განცხადება, ჩვენს მიერ ოპოზიციის რომელიმე დეპუტატის მიმართ ზეწოლაზე.
უფრო მეტიც, მე ვფიქრობ, რომ ამ დეპუტატებს ვინც აიძულა საკუთარი ნების წინააღმდეგ მოქმედება, ეს არის „ქართული ოცნება“ რადგან არ მგონია, რომ ისე, უბრალოდ ადამიანებს საკუთარი თავები ასეთ მძიმე მდგომარეობაში ჩაეყენებინათ.
ამასთან, კომიკურია, რომ ზეწოლაზე საუბრობენ ადამიანები, რომლებმაც რუსული კანონის მიღება აიძულეს თავიანთ თანაპარტიელებს და უფრო მეტიც, თავი ვინც შეიკავა ის დეპუტატები საგანგებოდ დასაჯეს საკუთარი აზრისა და პოზიციის ქონის გამო.
განსაკუთრებით სავალალოა, რომ ამ რეპრესიებს ვერ გადაურჩა გენერალი ჩაჩიბაია.
არ მესმის, უახლოეს წარსულში ამ ქმედების ჩამდენი ძალა როგორ საუბრობს ვინმეს ზეწოლაზე და ზემოქმედებაზე.
ჩვენს მოქალაქეებს ნამდვილად არ აქვთ მოკლე მეხსიერება და საჭირო მომენტში ყველა ამ ქმედებებისთვის პასუხს მოსთხოვს ბოლო პერიოდში ყველა ანტი ეროვნულ, ანტი ქართულ ძალას იმ ანტი სახელმწიფოებრივი ქმედებებისთვის, რომლებიც მათ ჩაიდინეს.
რა შეეხება დეპუტატების მხრიდან ხმის მიცემას, თითოეულ მათგანს უნდა ეყოს ვაჟკაცობა და აღიარონ რა მოტივაციით დაუჭირეს მხარი „ქართული ოცნების“ მიერ მოწონებულ კანდიდატებს”, – განაცხადა პაატა მანჯგალაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
