“5 თვის განმავლობაში უზენაესი სასამართლოსგან ვერ ვეღირსეთ პალატის დაკომპლექტებას, რაც მიუთითებს იმაზე, რომ უბრალოდ უარს გვეუბნებიან მართლმსაჯულების განხორციელებაზე” – დიტო საძაგლიშვილი ნიკა გვარამიას საქმეზე

პატიმრობაში მყოფი, ,,მთავარი არხის” გენერალური დირექტორის, ნიკა გვარამიას საქმის მიმოხილვას აფასებს ადვოკატი, დიტო საძაგლიშვილი. მისი განმარტებით, სხვადასხვა მიზეზების გამო სასამართლო პროცესები შეფერხებით მიმდინარეობს:

,,მას შემდეგ, რაც მოსამართლე ჩხიკვაძემ უკანონო განაჩენით ნიკა გვარამია დააპატიმრა, ჩვენ ვნახეთ უკვე სააპელაციო სასამართლოში პროცესების განვითარება, რაც გარკვეულწილად, სასაცილოდ წარიმართა იმ თვალსაზრისით, რომ ჯერ მოსამართლეები საქმის განხილვაზე უარს ამბობდნენ და ვადებს არღვევდნენ იმ მოტივით, რომ ზაფხულში დასვენება და შვებულება სჭირდებოდათ.

ამის შემდეგ ვნახეთ სასამართლო პროცესები, სადაც ცხადია, მოსამართლეები გარკვეულ კითხვებს სვამდნენ, იმართებოდა დისკუსია. თუმცა, ამის შემდეგ ვნახეთ განაჩენი, რომელიც არა თუ აცდენილი იყო იმ განხილვებისგან, არამედ დიამეტრალურად განსხვავდებოდა. რაც მიუთითებდა ერთადერთ რამეზე, რომ ეს არ იყო სააპელაციო სასამართლოს განაჩენი.

ამის შემდეგ გადავინაცვლეთ უკვე უზენაეს სასამართლოში, სადაც დაახლოებით 5 თვეა გასული ჩვენს მიერ საჩივრის შეტანიდან. დღემდე, ანუ 5 თვის განმავლობაში, უზენაესი სასამართლოსგან ვერ ვეღირსეთ პალატის დაკომპლექტებას, რაც მიუთითებს იმაზე, რომ უბრალოდ უარს გვეუბნებიან მართლმსაჯულების განხორციელებაზე”, – განაცხადა დიტო საძაგლიშვილმა.

ავტორი
ნინი ხიჯაკაძე