“ჩემი მოლოდინი იყო სრულიად განსხვავებული” – გიული ალასანია მიხეილ სააკაშვილთან მიმართებით სტრასბურგის სასამართლოს გადაწყვეტილებაზე

სტრასბურგის სასამართლოს გადაწყვეტილებასთან დაკავშირებით მედიასთან კომენტარს აკეთებს საქართველოს მე-3 პრეზიდენტის დედა, გიული ალასანია. მისი განმარტებით, მიხეილ სააკაშვილის საზღვარგარეთ მკურნალობის საკითხზე, ევროსასამართლოს უარყოფით გადაწყვეტილებაზე კონკრეტულმა მიზეზებმა იმოქმედეს და აღნიშნა, რომ ახლა იწყება საქმის განხილვის მეორე ეტაპი:

,,ჩემი მოლოდინი იყო სრულიად განსხვავებული, მივიღეთ ის შედეგი, რაც არის. მეორე ეტაპზე გადავდივართ, ვნახოთ როგორ დამთავრდება.

ლაპარაკი იყო პოლონეთში გადაყვანაზე. ყველაფრის ძირითადად ინიციატორი იყო პოლონეთი – იმ 27 ქვეყნის (ევროკავშირის) ქვეყნების შეკრების. პოლონელ ექიმებთან დაკავშირებით, დავინახეთ რითი დამთავრდა მათი მცდელობა – არ დაუშვეს რომ შესულიყვნენ.

სხვათა შორის, არ დაუშვეს სრულიად შეგნებულად იმიტომ, რომ ჩვენ ფაქტიურად არ გვქონდა უახლესი მონაცემები და [სტრასბურგის] სასამართლო დაყრდნობოდა იმას, რასაც ,,ვივამედი“ აწვდის. რაღაცა ჩაკეტილი წრეა. მაშინ რა გამოდის? – ჩვენი მხრიდან, ობიექტური მხრიდან არანაირი მონაცემები არ იყო“, – განაცხადა გიული ალასანიამ.

ავტორი
ნინი ხიჯაკაძე