IRI-ის კვლევის შედეგებს ეხმაურება და ამ მონაცემებზე დაყრდნობით 2024 წლის არჩევნებისთვის საპარლამენტო მანდატების განაწილების 2 სავარაუდო სცენარზე საუბრობს კონსტიტუციონალისტი ვახტანგ ხმალაძე:
“2024-ის არჩევნების შედეგი თუ ისეთი იქნა, როგორიც IRI-ის გამოკითხვამ გვიჩვენა, 5%-იანი საარჩევნო ზღურბლის გამო „ოცნება“ მიიღებს 87 მანდატს, ენმ კი – 63-ს. ვიმედოვნებ, რომ არჩევნების შედეგი, როგორც ყოველთვის, გამოკითხვისაგან მნიშვნელოვნად განსხვავებული იქნება.
თუ ზღურბლი 2% იქნება, „ოცნება“ მიიღებს 56 მანდატს, ენმ – 42-ს, გახარია და ზურაბ ჯაფარიძე – 9-9-ს, 4 პარტია – 6-6-ს, 2 პარტია – 5-5-ს. შესაბამისად, უმრავლესობის შესაქმნელად „ოცნებას“ დასჭირდება კიდევ 20 მანდატი, რასაც ამ პარტიათაგან, ჩემი აზრით, ვერ მოაგროვებს. თუ ასე მოხდა, უმრავლესობის შექმნა მხოლოდ ენმ-თან კოალიციის შექმნით მოხერხდება. თუ ესეც ვერ მოახერხეს, დაინიშნება რიგგარეშე არჩევნები“, – წერს ფეისბუქის პირად გვერდზე ვახტანგ ხმალაძე.
ინფორმაციისთვის. IRI-ის კვლევის შედეგებში შეკითხვაზე “საპარლამენტო არჩევნები მომავალ შაბათს რომ ტარდებოდეს, რომელ პარტიას მისცემდით ხმას?” პირველი არჩევანის პროცენტები ასე გადანაწილდა:
- “ქართული ოცნება” – 19%
- “ერთიანი ნაციონალური მოძრაობა – მიხეილ სააკაშვილი” – 14%
- გიორგი გახარია – “საქართველოსთვის” – 3%
- “გირჩი – მეტი თავისუფლება” (ზურაბ გირჩი ჯაფარიძე) – 3%
- შალვა ნათელაშვილი – “ლეიბორისტული პარტია” – 2%
- “ლელო” – 2%
- “გირჩი” – 2%
- გიორგი ვაშაძე – “სტრატეგია აღმაშენებელი” – 2%
- ანა დოლიძე – “ხალხისთვის” – 2%
- ალეკო ელისაშვილი – “მოქალაქეები” – 2%
- “ალტ-ინფო” – 1%
- ელენე ხოშტარია – “დროა” – 1%
- გიგა ბოკერია – “ევროპული საქართველო” – 1%
- “პატრიოტთა ალიანსი” – 1%-ზე ნაკლები
- “ხალხის ძალა” – 1% -ზე ნაკლები
