“ჩვენი ოპონენტები რატომ არ ამბობენ, რომ კეზერაშვილისგან დღემდე იღებენ ევროპელი პენსიონერებისთვის მოპარულ ფულს?” – გიორგი ამილახვარი

საქართველოს განათლებისა და მეცნიერების მინისტრი, გიორგი ამილახვარი განცხადებას აკეთებს თავდაცვის ყოფილი მინისტრის, ტელეკომპანია ,,ფორმულას” დამფუძნებლის, დავით კეზერაშვილის საქმესთან დაკავშირებით და ოპოზიციას მოუწოდებს, რომ
პირველ რიგში, აღნიშნული საქმის გამოძიებით დაინტერესდნენ:

,,ჩვენი ოპონენტები რატომ არ ღელავენ კეზერაშვილზე? რატომ არ ამბობენ და არ აკეთებენ კომენტარს იმაზე, რომ მისგან დღემდე იღებენ ევროპელი პენსიონერებისთვის მოპარულ ფულს? რატომ არ აკეთებს ის ტელევიზია განცხადებას, რომელიც პირდაპირ ფინანსდება ევროპელი პენსიონერებისგან მოპარული ფულით? და ა.შ.

ჩვენ კოლეგებს ოპოზიციაში ვურჩევდი, რომ პირველ რიგში – ამ საკითხებით დაინტერესდნენ.

საგამოძიებო უწყებები ყველა ზომას მიმართავენ, რომ შესაბამისი სამართლებრივი შედეგი დადგეს. დაწყებული კეზერაშვილით, დამთავრებული ნებისმიერი პიროვნებით, ვინც ჩართულია ამ საუკუნის თაღლითობაში, პასუხისგებაში იქნეს მიცემული”, – განაცხადა გიორგი ამილახვარმა.

ავტორი
ნინი ხიჯაკაძე