“ამას ბიუჯეტის ქურდობას ვერ დავარქმევ, ეს არის ბიუჯეტის ორგანიზებული ყაჩაღობა!” – ჯუანშერ ბურჭულაძე

საქართველოს თავდაცვის მინისტრი, ჯუანშერ ბურჭულაძე ჟურნალისტებთან აცხადებს, რომ თავდაცვის ბიუჯეტის ასობით მილიონი ლართან დაკავშირებითაა გაურკვევლობა, რასაც წინა ხელისუფლების დროს, თავდაცვის ყოფილი მინისტრის, დავით კეზერაშვილის პასუხისმგებლობის ქვეშ განიხილავს, რომელსაც ქართული სამართალდამცავი სისტემა, ამ ეტაპზე, 5 მილიონ ევროს ედავება:

,,ეს 5 მილიონი არ არის მხოლოდ ის თანხა, რომლითაც გაძარცვა სახელმწიფო ყოფილმა ხელისუფლებამ – ჩვენ გვაქვს ასობით მილიონი. დღემდე ვერ გამოვასწორეთ ჩვენი უწყების ფინანსური ანგარიშგება. ზუსტად ამ უპასუხისმგებლო და ძარცვის შედეგად მიყენებული ზიანის გამო.

კიდევ არის ასობით მილიონი, რომელიც არის ჩამოკიდებული დებიტორულ დავალიანებად. ჩვენ ახლა მაქსიმალურად ვცდილობთ, რომ მოვახდინოთ იდენტიფიცირება, რომელი იყო არაკომპეტენტურობით გამოწვეული და რომელი ყაჩაღობით.

რა თქმა უნდა, კეზერაშვილის პასუხისმგებლობაა. ამას მე ბიუჯეტის ქურდობას ვერ დავარქმევ, ეს არის ბიუჯეტის ორგანიზებული ყაჩაღობა! ყოფილი ხელისუფლების მიერ ეს იყო ორგანიზებულად სახელმწიფოს ძარცვა. ამ ძარცვით არ დასრულდა ეს ისტორია და ამის გაგრძელება არის ის, რომ შემდეგ ძარცვავდნენ ჩვენი მეგობარი ქვეყნების პენსიონერებს”, – განაცხადა ჯუანშერ ბურჭულაძემ.