პარტია “სტრატეგია აღმაშენებლის” გენერალური დირექტორი, პარლამენტის წევრი პაატა მანჯგალაძე მწვავე შეფასებებით ეხმაურება პარლამენტის ვიცე-სპიკერის, არჩილ თალაკვაძის განცხადება 7-8 მარტის მოვლენების გამოძიებასთან დაკავშირებით და კონკრეტულ ბრალდებებს უყენებს ხელისუფლებას:
“რაც შეეხება 7-8 მარტის მოვლენებზე გამოძიებასთან დაკავშირებით თალაკვაძის განცხადებას, პირდაპირ შემიძლია ვთქვა, რომ ნამდვილად გამოსაძიებელია ვისი მითითებით მოხდა რუსული კანონის საქართველოს პარლამენტში ინიცირება და შემდგომში, დაჩქარებული წესით განხილვა რადგან ამ რუსული კანონის მიზანი იყო ევროპული კურსის დივერსია და კანდიდატის სტატუსზე მოლაპარაკებების ჩაგდება, რაც დაადასტურეს კიდევაც ევროპელმა პარტნიორებმა.
შესაბამისად, ჩვენ უნდა გამოვიძიოთ არა ის თუ რატომ აღშფოთდა ხალხი და რატომ გამოვიდნენ ქუჩაში ახალგაზრდები, არამედ ის ვისი მითითებით და წახალისებით ხორციელდებოდა შეთქმულება საქართველოსა და მისი ევროპული კურსის წინააღმდეგ.
როცა ხელისუფლება გადის კონსტიტუციიდან მას უკვე უფლება არ აქვს ხალხს მოსთხოვოს კანონების ზედმიწევნით განხორციელება. არ იფიქროთ, რომ ვინმეს ძალადობას ვამართლებ, უბრალოდ ვაზუსტებ, რომ მოძალადე იყო ხელისუფლება, რომელმაც იძალადა საქართველოზე, კონსტიტუციაზე და ხალხზე და მხოლოდ ამაზე იყო ხალხის კანონიერი პროტესტი.
ჩვენ, „სტრატეგია აღმაშენებელი“ არ დავუშვებთ აქციის მონაწილეების დემონიზებას და ჩვენი შესაძლებლობების ფარგლებში ყველაფერს გავაკეთებთ რათა დავიცვათ ხელისუფლებისგან დევნილი აქციის ნებისმიერი მონაწილე”, – აცხადებს პაატა მანჯგალაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
