საქართველოს მე-4 პრეზიდენტი, გიორგი მარგველაშვილი ჟურნალისტებთან განცხადებას აკეთებს ოპოზიციის სამოქმედო გეგმასთან დაკავშირებით. მისი განმარტებით, ქვეყანაში რიგგარეშე არჩევნები უნდა დაინიშნოს და ამ მიზნის გარშემო ოპოზიციური სპექტრი გაერთიანდეს, პროცესებში მონაწილეობას კი თავად ექსპრეზიდენტიც მიიღებს:
,,ახლა მნიშვნელოვანია ერთიანი პოლიტიკური პოზიციის ჩამოყალიბება, რომ რიგგარეშე არჩევნები უნდა დაინიშნოს – ეს პირველი. რაც არის პოლიტიკურად აუცილებელი. იმიტომ, რომ პრორუსული და არასანდო ხელისუფლების ხელში, ჩვენი დღის წესრიგი მხოლოდ შეიძლება იყოს, რომ რამე არ დააშავონ და ის, რომ რამეს გააკეთებენ – ეს გამორიცხულია.
მეორე მომენტი – მე მიმაჩნია, რომ ისევ ქართველ ამომრჩველს უნდა შევთავაზოთ არა ორპოლუსიანი საარჩევნო არჩევანი და ამ პოლიტიკური ძალის, რაც შეიძლება სწრაფად, მშვიდობიანად შეცვლა არის პოლიტიკური დღის წესრიგის მიზანი.
ამ ვითარების განხორციელება აერთიანებს მთელ ოპოზიციურ პროდასავლურ პოლიტიკურ სპექტრს. შესაბამისად, ისინი ამ მიზანში ერთად უნდა მოძრაობდნენ და არა ცალ-ცალკე. ეს ლოგიკურია. ისინი ერთად უნდა იყვნენ, მაგრამ ეს არ ნიშნავს, როდესაც უკვე დაინიშნება არჩევნები, რომ ერთი სიით უნდა გავიდნენ.
ჩვენ უნდა მოვახერხოთ მესამე ალტერნატივის შეთავაზება ქართული საზოგადოებისთვის. აუცილებელია ის, რაც იყო პოლიტიკურ დღის წესრიგში 2020 წელს, მოხდეს უფრო გამსხვილებული პროდასავლური ალტერნატივის შექმნა“, – განაცხადა გიორგი მარგველაშვილმა.
ავტორი
ნინი ხიჯაკაძე
