“ახალი საქართველოს” ლიდერი გიორგი ვაშაძე ბიძინა ივანიშვილის განცხადებას გამოეხმაურა, რომელიც წყალტუბოს განვითარების პროექტს ეხება. ვაშაძეს მიაჩნია, რომ ივანიშვილის ინიციატივა წინასაარჩევნო სატყუარაა, რომელზეც საზოგადოება არ უნდა წამოეგოს.
“ჩემს უკან არის “ლაგუნა ვერე” რომელიც რეალური სახეა ბიძინა ივანიშვილის. იმის, თუ როგორ ინვესტიციებს ახორციელებს და როგორ უყვარს მას საკუთარი ქვეყანა. “ლაგუნა ვერე” 90-იან წლებშიც კი არ ყოფილა გაჩერებული. მას შემდეგ, რაც ივანიშვილმა შეიძინა, ფაქტობრივად ამ ტერიტორიის ინფრასტრუქტურა გაუბედურებამდე მიიყვანა. აღნიშნული ტერიტორიის მახლობლად არის ფაბრიკის ტერიტორია, რომელიც ასევე მის საკუთრებაშია და რომელიც ქალაქის ცენტრში სანაგვედ იქცა.
ამ ადამიანს 1 ლარად შეძენილი აქვს 43 მილიონი კვადრატული მეტრი მიწა და მაგალითისთვის აბაშაში, სადაც უზარმაზარი ტერიტორიები შეიძინა, აბაშელებმა იციან, რომ არცერთი ინვესტიცია არ ჩადებულა იმ ტერიტორიებზე. ყოველივე აღნიშნულის ფონზე, გუშინ გამოვიდა და გვეუბნება, რომ წყალტუბოში აპირებს უზარმაზარი ინვესტიციის ჩადებას.
მოდით კითხვა დავსვათ, – რა არის მისი მიზანი?! რატომ აკეთებს ამ ყველაფერს?! ფიქრობს, რომ ეს იქნება მისთვის წინასაარჩევნო სატყუარა. განა წყალტუბოზე, ან წყალტუბოელებზე ზრუნავს, განა ქვეყანაში საკურორტო ბიზნესის განვითარებაზე ზრუნავს? ერთადერთი, რაც უნდა, ხელისუფლების შენარჩუნებაა და შესაბამისად, ივანიშვილმა წინასაარჩევნო თაღლითობა დაიწყო.
ერთი წლის წინ, როდესაც საპრეზიდენტო არჩევნებს აგებდა კვლავ დაგვპირდა, რომ ამ ერთხელ გვაპატიეთ და ქვეყანას ფეხზე დავაყენებო. ერთი წლის თავზე საქართველოს ჰყავს მილიონი უმუშევარი ადამიანი, ინვესტიციები ქვეყანაში შემცირდა 54%-ით. საქართველოში ერთ მილიონ ადამიანს სოციალურად დაუცველის სტატუსი აქვს და ეძებს ორ “კაპიკს” მაინც, რომ ბავშვები გამოკვებოს, სოფლები დაიცალა. ეს არის მისი რეალური სახე.
საზოგადოებას მივმართავ, ეს სატყუარა არ უნდა გადავყლაპოთ. ივანიშვილს როგორც კი მოვიცილებთ, ინვესტიციებიც შემოვა, ეკონომიკაც განვითარდება და უმუშევრობაც დამარცხდება. ეს კაცი თითოეული ქართული ოჯახისთვის თავის ტკივილია“, – განაცხადა გიორგი ვაშაძემ.
