სახალხო დამცველის თანამდებობაზე პარლამენტის თავმჯდომარის მოადგილე, ლევან იოსელიანი საპარლამენტო უმრავლესობისა და ცალკეული დეპუტატების მიერ იქნა არჩეული. ომბუდსმენის რანგში პირველ კომენტარში აცხადებს, რომ იქნება მიუკერძოებელი და ნეიტრალური:
,,პირველ რიგში, მადლობა მინდა გადავუხადო, პარლამენტის ყველა წევრს, რომელმაც მე გამომიცხადა ნდობა და რომელმაც ჩემს სასარგებლოდ მიაჭირა მხარდაჭერის ღილაკს ხელი.
მე, დღეს, როდესაც გამოვედი ამ დარბაზიდან, აღარ ვარ პოლიტიკოსი. მე ვარ არჩეული სახალხო დამცველი და ყველა ჩემი ქმედება, განცხადება – ეს იქნება მიმართული ადამიანების უფლებებზე, ადამიანების უფლებების ზედამხედველობაზე.
რაც მთავარია, რაზეც უამრავი კითხვა იქნა დასმული, ვიქნები თუ არა ნეიტრალური და მიუკერძოებელი? – სწორედ ჩემი საქმიანობის მომავალი ექვსი წელი იქნება დამტკიცება იმის, რომ მე ვიქნები მიუკერძოებელი, აპოლიტიკური და ნეიტრალური ნებისმიერი პოლიტიკური პრეფერენციის მიმართ.
ეს არის, რაც მინდოდა მეთქვა. ამაზე მეტს – მე უკვე ვისაუბრებ მას შემდეგ, რაც შევუდგები ჩემ საქმიანობას”, – განაცხადა ლევან იოსელიანმა.
ავტორი
ნინი ხიჯაკაძე
