“NDI-ის კვლევამ ნათლად დაგვანახა, რომ “ქართული ოცნების” ანტიქართული, ანტიდასავლური და ანტიუკრაინული პროპაგანდა რეალურად არ მუშაობს” – გიორგი ვაშაძე

NDI-ის კვლევის შედეგების შეფასებას ახდენს “სტრატეგია აღმაშენებლის” თავჯდომარე, გიორგი ვაშაძე და ყურადღებას ამახვილებს იმაზე, რომ უმნიშვნელოვანესია კონკრეტული პრობლემებისა და საკითხების გადაწყვეტაზე მუშაობა, რაც ჩვენს მოქალაქეებს ყოველდღიურად აწუხებს:

“NDI-ის კვლევამ ნათლად დაგვანახა, რომ “ქართული ოცნების” ანტიქართული, ანტიდასავლური და ანტიუკრაინული პროპაგანდა რეალურად არ მუშაობს.

საქართველოს მოქალაქეებმა კარგად იციან, რომ ომი უკრაინაში პუტინის რუსეთმა დაიწყო, რუსეთი არის აგრესორი და მხარს უჭერენ უკრაინას. ასევე, მოსახლეობის დიდი უმრავლესობა მხარს უჭერს საქართველოს ნატოსა და ევროკავშირში გაწევრიანებას. რაც კიდევ ერთხელ ადასტურებს, რომ ევროპა არის ჩვენი ისტორიული არჩევანი და ეს ვერ შეიცვლება.

მიუხედავად იმისა, რომ “ქართული ოცნება” დაადგა აშკარა ღალატის გზას, მათ ვერ შეძლეს საქართველოს ევროკავშირში გაწევრიანების მომხრეთა არჩევანის შეცვლა. უფრო მეტიც, ნატოში გაწევრიანების მომხრეთა რაოდენობა სტაბილურად მაღალია, ხოლო ევროკავშირის მხარდამჭერთა რაოდენობა, წინა კვლევასთან შედარებით, კიდევ უფრო გაიზარდა.

მოსახლეობის უმრავლესობა მიიჩნევს, რომ რუსეთი მტერია. მმართველი ძალის მხრიდან საპირისპიროს მტკიცების მიუხედავად, აღნიშნულ საკითხთან მიმართებითაც არ შეცვლილა საზოგადოების დამოკიდებულება, უფრო მეტიც, გამოკითხულთა თითქმის 70 პროცენტი მიიჩნევს, რომ რუსეთის მოქალაქეებისთვის საჭიროა სავიზო რეჟიმის შემოღება.

ასევე, გამოკითხულთა 70 პროცენტი აცხადებს, რომ ხელისუფლება ან არაფერს აკეთებს ევროკავშირში ინტეგრაციისთვის, ან რასაც აკეთებს არასაკმარისია.

ეს ყველაფერი ერთი დასკვნის გაკეთების შესაძლებლობას გვაძლევს, მოსახლეობის უმეტესობას სურს ევროკავშირში ინტეგრაცია და მიაჩნია, რომ რუსეთი მტერია. ასევე თვლიან, რომ “ქართული ოცნება” დასავლეთში ინტეგრაციისთვის ფაქტობრივად არაფერს აკეთებს.

იმისთვის, რომ საზოგადოების ეს განწყობა გარდაისახოს ოპოზიციური პარტიების რეიტინგში, საჭიროა, ჩვენ ვესაუბროთ ადამიანებს მათთვის პრობლემატური საკითხების გადაჭრის გზებზე. თითოეულმა ადამიანმა უნდა დაინახოს, რომ ჩვენ გვაქვს კონკრეტული გეგმები, რომლებიც მათ პრობლემებს მოაგვარებს.

კვლევა ასევე მიუთითებს, უფრო მეტი დრო უნდა დავუთმოთ იმ პრობლემებისა და საკითხების გადაწყვეტას, რაც ჩვენს მოქალაქეებს ყოველდღიურად აწუხებს. არ უნდა მივცეთ “ქართული ოცნების” პროპაგანდას შესაძლებლობა, რომ მთავარი საკითხებიდან ყურადღება მეორეხარისხოვან საკითხებზე გადავიტანოთ“, – აცხადებს გიორგი ვაშაძე.

ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს